Тываның школачыларының дистанциялыг өөредилгезин февраль 14-ке чедир узаткан

06.02.2022 Ниити өөредилгениң школачылары, ортумак профессионал өөредилгениң сургуулдары болгаш дээди өөредилге черлериниң студентилериниң дистанциялыг өөредилгезин ам база узаткан. Чаа коронавирустан аараан уругларның саны көвүдеп турарындан ындыг шиитпирни үндүрген. Росхереглел хайгааралының Тывада эргелелиниң болгаш ТР-ниң Кадык камгалал яамызының дыңнатканы-биле алырга, Covid-19-тан аараан улустуң саны февраль 5-те 586 четкен. Эпидемиологтуг шинчилелдерниң түңнелинде билдинип келгени, уруглар колдуунда аарыгны өг-бүлезинден чыпшырып ап, оон өөредилге черинге келгеш, эш-өөрүнче халдадып турар болган. Ону соксадыры-биле, ырактан өөренирин узадыр шиитпир хүлээп алдынган. Тываның Баштыңының 2022 чылдың январь 17-де №30 чарлыынче, февраль 14-ке чедир ырактан өөренир хевирни узаткан дугайында өскертилгени киирген №45 чарлыкты 2022 чылдың февраль 4-те үндүрген. Эпидемиологтуг байдалды көрүп тургаш, чамдык муниципалдыг тургузугларда школалар ырактан өөредир шиитпирни февраль 15 соонда боттары үндүрүп болур. Росхереглел хайгааралының саналы азы чөпшээрели-биле административтиг девискээрлерге кызыгаарлаан хемчеглерни киирип болур эрге кожуун чагырга даргаларында барын сагындыраал. Росхереглел хайгааралынга дыңнатпышаан, школага азы аңгы класска карантинни киирер шиитпирни үндүрер эрге школа директорунда база бар. Өөредилге черлеринден аңгыда, фитнес-залдарның, фитнес-клубтарның, тренажер залдарының база күш-культуржу-кадыкшылга комплекстериниң ажылында база эдилгелерни документиде киирген. Мооң мурнунда оларның ажылын түр када соксаткан турган болза, ам негелделерни сагывышаан ажылдаарын чөпшээрээн. Фитнес-залдар, фитнес-клубтар база тренажер залдары абонентилиг хамаатыларны хүлээп болур. Ында кижилер 50 хуу долдуртунган болур ужурлуг. А спорткомплекстерге РФ-тиң Спорт яамызының 2022 чылдың спортчу хемчеглерниң Чаңгыс аай календарында спортчу маргылдааларга киржир спортчулар белеткенип болур. Сөөлгү хонукта 586 аараан кижиниң 196-зы эр, 390-ы херээженнер.18 хардан 49 харга чедир 324 кижи аараан. 17 харга чедир 80 уруг чаа коронавирус халдавырындан аараан. Январь 1-ден тура республикада 6734 кижи коронавирустаан.