«ЛАДЬЯ. Кышкы тоол-2021» бүгү-российжи ярмаркага тыва шеверлер бир дугаар киришкен

29.12.2021 Россияның улусчу уран ус-тывыштың «ЛАДЬЯ. Кышкы тоол-2021» бүгү-российжи делгелге-ярмарказынга Тывадан сайгарлыкчылар болгаш бодун ажыл-биле хандыртынган хамаатылар бир дугаар киришкеш, «Регион экспозициязының тулган шимелдези» номинацияга диплом-биле шаңнаткан. Декабрьның 15-19 хүннеринде, Москвада «Экспоцентр» төп делгелге комплекизинге 30 дугаар юбилейлиг ярмарка болуп эрткен.
Россияның ус шеверлериниң делгелге-ярмарказынга чоннуң уран чүүлүнүң делегейде билдингир төптери боттарының тулган дээн ажылдарын делгээри чаңчыл болу берген. «Биче болгаш ортумак сайгарлыкчы чорукту болгаш хуу сайгарлыкчы инициативаны деткиири» национал төлевилелден деткимче алган үш сайгарлыкчы болгаш бодун ажыл-биле хандыртынган үш кижи тыва бөрттерни, чеңи-чоктарны, боттарының чогааткан идиктерин, ол ышкаш дойдан, ыяштан, чинчилерден суй-белектерни, сарлык дүгүнден кылган чүүлдерни Тываның продукциязы кылдыр делгээн.
«Биче болгаш ортумак сайгарлыкчы чорукту болгаш хуу сайгарлыкчы инициативаны деткиири» национал төлевилел Россияда сайгарлыкчы чорукту бүгү талазы-биле деткиир угланыышкынныг.
Регионнуң Экономиктиг хөгжүлде болгаш үлетпүр яамызының деткиишкини-биле Тыва Республиканы «ЛАДЬЯ. Кышкы тоол-2021» ярмаркада дараазында хуу сайгарлыкчылар болгаш бот-хандыртынган хамаатылар төлээлээн:
– Эльвира Ооржак (национал бөрттер, чеңи-чоктар);
– Арьяна Чагар-оол (дойдан кылыглар);
– Сергей Ооржак (ыяштан чазаан суй-белектер);
– Сайзанак Сарыглар (тыва кадыг идик, бопук);
– Аяна Донгак (ширтектер);
– Орлана Намзын (сарлык дүгүнден кылыглар: хевистер, уктар, бөрттер, сарлык кештери).
Бүгү-российжи делгелге-садыглаашкынга  Тываның  билдингир ус-шевер мастерлери Аржаана Салчак биле Омак Оюн (тыва хептер, бөрттер), Ховалыг Алдынай биле Саглаш Ооржак (аргаан довурзак бөрттер), Саглай Саая (малахай тыва бөрттер), Экер-оол Салчак (бода малдың дуюндан кылган соктаар хөгжүм херексели), Кенин Сат (хамның хөрекке азар күзүнгүзү), Олег Хомушку, Шолбан Куулар, Танаа-Херел Ойдупаа (хомустар), Эмма Монгуш (тыва чеңи-чоктар), Юрий Ооржак (чонар-даштан суй-белектер) база Екатерина Кара-Донгак (чавагалар, чинчи-шурудан кылган кыс сумкалар) эң эки ажылдарын делгээн.
«ЛАДЬЯ. Кышкы тоол-2021» юбилейлиг делгелге-садыглаашкын РФ-тиң экономиктиг хөгжүлде яамызының, РФ-тиң Культура яамызының, РФ-тиң Үлетпүр болгаш садыглаашкын яамызының, РФ-тиң Садыг-үлетпүр палатазының деткимчези-биле болуп эрткен.