Тываның чурттакчылары “Күзелдер шивизи”-биле бодалдарын боттандырган

28.12.2021 «Мээң-биле кады сагыштаалы” ачы-буян төлевилелиниң чылдың-на эртип турар “Күзелдер шивизи” бүгү-российжи акцияга республика баштыңы бөгүн, декабрь 28-те, Тываның найысылалынга киришкен.
Республика Чазаанда тургускан шивиде аскан “ойнаарактарда” оолдар, уругларның күзелдерин бижээн. Бо чылын шак ол акцияга чүгле уруглар эвес, а улуг назылыг кижилер база киржир аас-кежиктиг болган.
Владислав Ховалыг Чаа чылдың Шивизинден үш күзелдерни тырткан. Каа-Хем кожууннуң Ильинка суурдан 12 школачы уруг чиик атлетикага белеткенип кедер чаа спортчу идик-хептиг болуксаан күзелин бижээн. Республика Баштыңы видео таварыштыр долгашкаш, белекти чорудуптарын аазаан. Кызылдың 63 харлыг чурттакчызы чылыг хөректээш күзеп турарын бижээн болза, найысылалдан 14 харлыг уруг Петербургтуң Эрмитажын көрүксээн күзелин боттандырып бээрин даргадан дилээн. В. Ховалыг хоорай чурттакчылары-биле декабрь 30-де ужуражырын дугурушкан.
- Тыва - “Күзелдер шивизи” чаңчылчаан акцияның киржикчизи. Соок-Ирей ышкаш, бистиң республиканың чурттакчыларының күзелдерин боттандырарымга, өөрүдүм. Бо кайгамчык акцияга киржиринче энерел сеткилдиг чонумну чалап тур мен. Бистиң ажы-төлүвүстүң, кырган-ача, кырган-аваларывыстың шырайын хүлүмзүрүг каастап чорзун – деп, Владислав Ховалыг чугаалаан.
Акцияга Тываның Чазааның кежигүннери каттыжып, республиканың улуг, бичии чурттакчыларның шупту 46 күзелдерин боттандырар.
Россия Федерациязының бүгү девискээринде “Мээң-биле кады сагыштаалы” бүгү-российжи ачы-буян төлевилелиниң “Күзелдер шивизи” акциязы 2018 чылдан бээр эгелээнин сагындыраал. Амыдыралдың берге байдалдарында кижилерге өөрүшкүнү сөңнеп, чаа чылдың хуулгаазынын көргүзери – акцияның сорулгазы. Өскүс болгаш ада-иезиниң хайгааралы чок арткан уруглар, кадыкшылы кызыгаарлыг кижилер, хөй ажы-төлдүг болгаш эвээш орулгалыг өг-бүлелерден чаштар белектерни алыр.