Тываның Баштыңы-биле «дорт чугаага» чедир чаңгыс хонук арткан

24.12.2021 Тываның Баштыңы Владислав Ховалыг декабрь 25-те «Тува 24» телеканалдың дорт дамчыдылгазында, республика чурттакчыларының хүннүң айтырыгларынга харыыларны бээр. Аңгы-аңгы дөстер таварыштыр 386 айтырыг бо шакка чедир кирген. Оларның хөй кезии тудуг болгаш чурттаар оран-сава айтырыынга хамааржыр. Чон колдуунда телефон харылзаазын ажыглап, айтырыгларны киирип турар. Декабрь 25-тиң 19.00 шакка чедир, “Дорт чугаа” төнгүжеге, айтырыгларны салып болур.
Республика төвүнүң, Кызыл база Чөөн-Хемчик кожууннарның чурттакчылары эң идепкейлиг болуп, хөй айтырыгларны киирген. 51 айтырыг – Кызыл хоорайдан, 12 – Кызыл кожуундан база 6-зы - Чөөн-Хемчиктен.
Эң-не хөй айтырыгларлыг дөрт адырга – тудуг болгаш чурттаар оран-сава, ЧКА база энергетика, социал камгалал, чер болгаш өнчү хамаарылгалары кирген.
glavatyva.ru сайтыда тускай майыкты долдуруп, азы «Вконтакте» социал четкиде база «Вайбер» мессенджерде «Тыва Республиканың Баштыңының онлайн-хүлээп алыышкыны» бөлүктер таварыштыр бижимел азы видео айтырыгларны чорудуп болурун сагындырдывыс. Албан езунуң бөлүү – vk.com/internetpriem. Албан езунуң чады – https://clck.ru/WdnB4.
Оон аңгыда, 8 (800) 200 85 16 халас дугаарже долгааш, айтырыгны салып болур силер.
Бо республика Баштыңының чон-биле ийи дугаар эрттирип турар дорт чугаазы болур. Бирги дорт харылзаа 2021 чылдың август 15-те болуп эрткен. Ынчан Тываның Баштыңынче 1208 дыңнадыг кирген, регионнуң удуртукчузу ол айтырыгларны харыыларны бээр даалгаларны чазак кежигүннеринге берген турган.
Владислав Ховалыгның бодалы-биле алырга, чон-биле мындыг дорт харылзаа кижилерни дүвүредип, хөлзедип чоруур айтырыгларны билип ап, оларны шиитпирлээр хемчеглерни дарый үндүреринге ажыктыг. Оон аңгыда, шак мынчаар алдынган информация эрге-чагырганың ажылын шын тургузарынга дузалаар.
«Дорт чугаа» программа декабрь 25-те 17.30 минутада эфирге үнер.