Тываның Баштыңының культура болгаш уран чүүл адырында грантызын бодун ажыл-биле хандырган Аян Чошкак алган

10.12.2021 Республиканың Культура болгаш туризм яамызы Тыва Республиканың Баштыңының культура болгаш уран чүүл адырында грантызынче чагыгларны хүлээп эгелээнин августа чарлаан турган. Культура болгаш уран чүүл адырында бодунуң ажылын чорудуп турар хуу сайгарлыкчылар болгаш боттарын ажыл-биле хандыртынган хамаатылардан 12 билдириишкин бо чылдың ноябрь 1-ге чедир кирген. Комиссияже киирген документилерни үнелеп көргеш, дойдан национал аянда суй-белек продукциязын бүдүрер төлевилелдиг Аян Чошкакты тиилекчи кылдыр үндүрген.
Культура болгаш уран чүүлге хамааржыр чогаадыкчы төлевилелдерни боттандырынга берген Тываның Баштыңының грантызы эгидилге чок.
Комиссия авторнуң төлевилелге дилеп турар түңүнден грантының хемчээлин тодарадыр. Бо таварылгада дилег киирикчизи 300 муң рубльди дилээн. Автор ол акшаны дой өрттедир печка база дойдан продукцияга чурук үндүрер принтер садып алырынче чарыгдаарын тайылбырлаан.
Регион Баштыңындан деткимче алыр дээн хуу сайгарлыкчылар болгаш ажыл-биле бодун хандыртырган кижилерден кирген 12 билдириишкинниң 5-жин, үндүрүг органнарында бүрүткеткен дугайында документ киирбээнинден, ойталаан.