Тываның Баштыңы Моолдуң чиңгине консулу-биле кады ажылдажылга айтырыгларын чугаалашкан

30.11.2021 Тыва Республиканың Баштыңы Тыва Владислав Ховалыг биле Кызылда Моолдуң чиңгине консулу, дээрги Чимид Ганболд ужурашкан. Россияның Моол-биле дипломаттыг харылзааларны тургусканындан бээр 100 чылдаанынга ужуражылга эрткен. Ийи тала кайы-даа адырларга моон-даа соңгаар кады сырый ажылдаарын дугурушкан.
«Транспорт, үлетпүр, көдээ ажыл-агый адырынга кады ажылдажылганы, культурлуг харылзааларны быжыглаарын чугаалажып көрдүвүс. Азия-Оожум океан регионнуң чурттары, эң кол – Моол-биле российжи сайгарлыкчыларның харылзаазын хөгжүдеринге кызыгаарлар аразының база бир оруун ажыдар аргаларны элээн хандыр чугаалаштывыс. 2023 чылда ажыглалче киирерин планнаан “Хандагайты” автомобиль эрттирилге пунктузун эде чаартырының айтырыын база көрдүвүс. Бо төлевилелдерниң боттанылгазы Тыва Республика биле Моолдуң кызыгаар чоогунда аймактарының  чурттакчыларынга эки салдарны чедирер дээрзинге бүзүрээр мен» - деп, Владислав Ховалыг бодунуң блогунда бижээн.
Тыва Республиканың Кызыл хоорайда 2021 чылдың ноябрьдан ажылын катап тургускан Моолдуң Чиңгине консул чери ажыттынганындан бээр 20 чыл оюн удавас демдеглээр. Консул чериниң округунда Тыва Республика, Алтай Республика, Хакас Республика база Алтай край кирип турар. Чиңгине консул черин ажытканы-биле Тыва Республика биле Моолдуң аймактарының аразында садыг-экономиктиг, эртем болгаш гуманитарлыг харылзааларның шынары бедээн.
2020 чылда Моолдуң Чазаа Убса-Нур аймакка төрүттүнген Ч. Ганболд дээргини Россия Федерациязының Кызыл хоорайда Моолдуң Чиңгине консулунга томуйлаан.