Тываның эмнелге албан черлериниң баазазын быжыглаарынга Москва дузалаан

28.10.2021 Тыва Москваның мэриязындан социал ужур-дузалыг төлевилелдерни деткииринге 200 млн рубль трансфертти алган. Москва биле Тываның Чазактарының аразында, 2021 чылдың июль 13-те чарганы дугуржулга езугаар, республикага дузаламчыны берген.
Тываның Баштыңы Владислав Ховалыг Москвага сургакчылап чорааш, “коронавирус халдавырынга удур демиселдиң берге үезинде улуг дузазы” дээш республика чурттакчыларның өмүнээзинден найысылалдың мэри Сергей Собянинге четтиргенин илереткенин соцчеткилерде дыңнаткан. Тываның эмнелге албан черлериниң материал-техниктиг баазазын быжыгларынче ол акшаларны угландырган деп, ол бижээн.
Кадык камгалалының 12 объектизинге капитал септелгени кылыр, 39 санныг амгы үениң эмнелге дериг-херекселдерин саткан. База ол ышкаш Кызылдың поликлиниказынга, Барыын-Хемчиктиң муниципалдар аразының эмнелге төвүнге база республиканың онкодиспансеринге лифт дериг-херекселиниң комплектилерин садар.
Октябрьның 27-де септелге кылыр тудугжулар тодараттынган, медицина техниказын декабрь 1-ге чедир эккээр керээ чардынган деп, ТР-ниң Кадык камгалал яамызы дыңнаткан. Лифт дериг-херекселин септеп, солуур ажылдар чагыын аукционда салган.
Коронавирус пандемиязы эгелээнден бээр, Москва Тывага чаңгыс эвес катап дузалаан. 2020 чылда, халдавырлыг аарыгның бирги чалгыында, москвачылар ковид аарыг кижилерни шинчип, эмнээринге 780 млн рубль түңнүг акшага, көжүп чоруур томограф, пульсоксиметрлер, өкпе тындырар дериг-херексел, кислород концентраторлары болгаш шыгыдыкчылары, тускай оруннар дээш, бүдүн составтыг фураларны Тываже чоруткан.
Оон аңгыда, Москваның Кадык камгалал департаментизи ковид эмнелгелерин организастаар, коронавирус пандемиязының үезинде кадык камгалалының бүгү системазының ажылын тургузар арга-дуржулгалыг боттарының эмчилерин Кызылче аъткарган. Эмчилер дериг-херекселдерни ажыглаарын айтып берип, республикага аарыгның бирги чалгыын база пандемияның эң берге үезин ажып эртеринге дузалашкан.