Тываның башкылары күш-ажылы дээш сентябрьда чаа система-биле эде санаан төлевирни октябрьда алыр

07.10.2021 Тываның Чазаа өөредилгe адырында ажылдакчыларның күш-ажылын чаа система-биле төлээриниң дугайында дүрүмнү бадылаан. 2021 чылдың сентябрь 20-де хүлээп алган 492 дугаар доктаалда, 2021 чылдың сентябрь 1-ден башкыларның шалыңын ийи катап өстүрерин айыткан. Чаа система-биле санаан шалың төлевирин, сентябрь айның база, бо айда шилчидерин Тываның Өөредилге болгаш эртем яамызы дыңнаткан.
Бо чылдың августа эрткен башкыларның чөвүлел хуралының үезинде, Тываның Баштыңы Владислав Ховалыг башкыларның күш-ажыл төлевириниң системазын эде көөр айтырыгны көдүрген. Башкылаашкын ажылын төлээр системаны эде көрүп, 18 шак кичээлдиг башкы эвээш дизе 24,5 муң акша алыр кылдыр санаарын Өөредилге яамызынга дааскан.
Сентябрь 13-те Өөредилге яамызының удуртулгазы, башкылаашкын дээш шалыңны 5600 рубль турганындан 12900 рубль кылдыр, ийи катап көдүрген шалың санаар чаа система дүрүмүнүң төлевилелин киирген. Күш-ажыл төлевириниң стимул бээр кезээн кызырып, магадылал кезээниң үлүүн көвүдеткеш, шалыңны өстүрген.
Башкының бир шалыңының хемчээли, компенсация база стимул төлевирлери чокка, район база соңгу чүк хууларын немээни кады, эвээш дизе 24 510 рубль болур. Ниити өөредилге организацияларында башкыларның шалыңының ортумак хемчээли 40 хуу өзүп, 26 034 рубль турганындан 36 453 рубль чеде бээр.
Республиканың Баштыңы Владислав Ховалыг башкыларга чаа система-биле санаан шалыңны төлээр айтырыгны бодунуң хыналдазында алган.