Тывага 1,7 миллиард рубль акшаны республикага школалар тудуунче бээр

28.09.2021 Россияның регионнарынга чаа школалар тудар талазы-биле төлевилелдер шилиириниң ийиги чадазы доозулган. Федералдыг төп 74 ажыг млрд рубльди төлевилел боттанылгазынче дээш девискээрлерге хуваар. Президент Владимир Путинниң даалгазы-биле, Россияның Чазааның даргазы Михаил Мишустин ол акша-хөреңгини үлээриниң дугайында айтыышкынга атты салган.
34 регион субсидияларны алыр. Олар шупту ажылдап эгелээринге беленин дыңнаткан. Бо чоокку чылдарда ол субъектилерге амгы үениң 128 школалары туттунар, немелде 93,7 муң өөредилге олуттары ажыттынар. Регионнар школалар тудуунче федералдыг акша-хөреңгиден аңгыда, боттарының хөреңгизин база киириштирер. Ооң-биле чергелештир инвесторларны база хаара тудар.
Школалар тудар субсидия алыр регионнар даңзызында Тыва база кирген. Тыва Республиканың өөредилге болгаш эртем сайыдының оралакчызы Юрий Ооржак Россия Федерациязының Чазаа республикага 825 олуттуг ийи школаны тударынга 1,7 млрд рубльди тускайлаанын дыңнаткан.
Регионнуң удуртукчузу Владислав Ховалыг август 3-те Россияның чырыдыышкын сайыды Сергей Кравцов-биле ужурашкаш, өөредилге адырында чидиг айтырыгларны сайгарып, 2020-2023 чылдарда Спутник микрорайонунуң 32-ги кварталынга база Кечил-оол кудумчузунда 14 дугаар школаның орнунга, ийи чаа школаны тударын чугаалажып алганын сагындыраал.
РФ-тиң Чазаа чаа школалар тудар төлевилелдер шилиириниң бирги чадазын түңнээн соонда, 43,5 млрд рубльди регионнарга үлээн. 2021 чылдың төнчүзүнде, 2022 чылдың эгезинде, дараазында чаданың шилилгезин чорудар. 2021–2024 чылдарда школалар тудар кылдыр федералдыг бюджеттен “Өөредилге хөгжүлдези” күрүне программазы таварыштыр 234,7 млрд рубльди тускайлаар.