Тывада гриппке удур тарылга эгелээн

13.09.2021 Росхереглел хайгааралының регион эргелелиниң дыңнатканы болза, чурттакчы чоннуң 60 хуузун азы 196 400 кижини, ооң иштинде 94 368 уругларны, 1459 иштиг херээженнерни гриппке удур тарыыр. Бюджеттен акшаландырган тарылганы кадык камгалал, өөредилге, социал адырның ажылдакчылары, студентилер, шеригже кыйгырткан оолдар, хоочураан арыг кижилер база 60 хардан өрү назылыг хоочуннарга салыр.
Республикада улуг кижилерге салыр 33070 санныг «Совигрипп» вакцина, база бичии уругларга 26600 санныг «Ультрикс-Квадри» вакцина белен бар. Октябрь ортаан үезинде дараазында партия келир.
Росхереглел хайгааралының регион эргелелиниң медээзи-биле алырга, эрткен неделяда грипптээн 1051 таварылганы бүрүткээн, 10 муң чурттакчыга онааштыр 30,9 кижи. 18 кижини эмнелгеде чыттырган, оларның санында 14 хар чедир назылыг 12 бичии кижилер бар.
Сезоннуг грипп халдавырынга удур холдарны чуп, хөй кижилерлиг черлерге масканы кедип, агаар-бойдуска дүүштүр кеттинип, өрээлдерни агаарладып, шын чемненири чугула.