Тожу, Мөңгүн-Тайга, Улуг-Хем, Каа-Хем кожууннар база Кызыл хоорай муниципалдыг бюджетти чедимчелиг удуртуп турар

10.09.2021 Тыва Республиканың Саң-хөө яамызы 2020 чылдың түңнелдери-биле муниципалдыг саң-хөөнү башкарып турарының шынарынга үнелелди берген. Тожу, Мөңгүн-Тайга, Улуг-Хем, Каа-Хем кожууннар база Кызыл хоорай казна акшаларын билдилиг чарыгдап турарын түңнел көргүскен. Арткан муниципалдыг тургузуглар бюджет планнаашкынының шынарын бедидип, үндүрүглер чыылдазын чедип алыр апаар.
Бюджет планнаашкынының шынары, ооң күүселдезиниң чедимчелии, казна акшаларын шын, билдилиг чарааны, бюджет чорудуун сагып турары дээн ышкаш критерийлерге даянып, муниципалдыг районнарның саң-хөө ажыл-чорудулгазын үнелеп көрген.
Ооң түңнели-биле, 8 муниципалдыг тургузуг саң-хөө акшаларын бедик деңнелде башкарып турар, а 11 муниципалитет – ортумак деп демдекти алганы билдинген.
Республиканың Саң-хөө яамызы бюджет күүселдезиниң шынары экижээнин демдеглээн. Ооң мурнунда чылга бодаарга, кожууннарның хөй кезии муниципалдыг район болгаш хоорай округунуң бюджединче үндүрүглер төлевилериниң түңүн көвүдеткен. Бюджет чорудуунуң ажык-чарлыының көргүзүглери база экижээн.
Саң-хөө яамызы акшаларны ортумак деңнелде башкарып турар муниципалдыг тургузугларга чогуур хемчеглерни алырын сүмелээн. Ылаңгыя, кожууннуң саң-хөө эргелелдери бюджет төлевилелин база ону күүсеткениниң отчедун, үндүрүглер база үндүрүглерге хамаарышпас орулгалар планының күүселдезин чонга таныштырары онза кичээнгейге турарын айыткан. Оон аңгыда, муниципалитеттер үндүрүглер чыылдазының талазы-биле ажылды күштелдирерин чедип алыр ужурлуг.