Тывада хамаатыларны ажылче хаара тударын деткээн регион төлевилелин түңнээн

10.09.2021 Бөгүнде республикада 3,5 муң кижи боттарын ажыл-биле хандырттынган. Бо чылдың 8 айының түңнели-биле, сайгарлыкчы чорукту деткиир инфраструктура организацияларында бодун ажыл-биле хандырттынган 200 ажыг хамааты күрүне деткимчезин алган.
Сайгарлыкчылар оон аңгыда, “Мой бизнес” төпке консультацияны ап, халас өөренип, тренинг, семинарларга олуржуп, чиигелделиг микрозаймнарны база магадылалдыг деткимчени алыр.
Бо чылын 211 кижи ТР-ниң Сайгарлыкчы чорук деткиир фондудан тайылбыр-өөредилгени эртип, микрозаймнарны алган. ТР-ниң Бизнес-инкубатору 15 кижиге бизнес-план тургузарынга дузалажып, а 3 кижиге республиканың чээли организацияларындан саң-хөө алырынга магадылалды берген.
Тывада идепкейжи аныяктарның бирээзи, билдингир фотограф база видеограф Темир Салчак: «Бодун ажыл-биле хандырттынган кылдыр бүрүткедип болур дээн чарлал номчааш, дораан демдеглеттим. Хуу бүдүрүлге деп бүрүткел чокка, ачы-дуза чедирилгезин хостуг эгелеп, бодун ажыл-биле хандырттынган деп эрге-байдалды алган мен».
Тыва Республиканың чурттакчылары бодун ажыл-биле хандырттынган кылдыр бүрүткедип, профессионал орулгазынга үндүрүгнү төлээр.