Тывага «Тыва хой эъдиниң фестивалы» онлайн-конкурс эртер

10.09.2021 Сентябрьның 22-23 хүннеринде, Кызылга аъш-чем кылырының «Тыва хой эъдиниң фестивалы» онлайн-конкурс болуп эртер. Хөй-ниити чемнелгезинде ажылдап чоруур сайгарлыкчылардан фестивальга киржир чагыгларны сентябрь 20-ге чедир хүлээр. Конкурс киржикчилери жюриниң шииткелинче, хой эъдинден кылган онзагай чаагай чемнерин белеткеп таныштырар. Чем кылыр мөөрейниң шаңнал фондузу 100 муң рубль.
Киржикчилер маргылдааның негелдези езугаар, кандыг-даа амдан киирер кылымал болгаш өңнээр бүдүмелдер чок, экологтуг арыг продуктулар ажыглап, чаңчылчаан азы амгы үениң национал чемнерин тус черниң хоюнуң эъдинден кылыр. Чем кылыкчылары боттарының белеткээн чемин 3 минута иштинде таныштырар, а жюри кежигүннери ону амзап, демдекти үндүрер. Ол үеде повар блюдозунуң тывылган төөгүзүн, ында чүлер кирип турарын, канчаар белеткээрин, амданы кандыызын база ажыктыг шынарларын тайылбырлап,  бүгү талазындан көргүзер.
Чеминиң технологтуг картазын таныштырары албан.
Конкурстуң тиилекчилеринге Тыва Республиканың «Мой Бизнес» төвүнүң дипломнарын болгаш өртектиг белектерин тыпсыр.
Конкурска киржир чагыгларны 2021 чылдың сентябрь 20-де, 9.00 шактан 18.00 шакка чедир дараазында адреске хүлээп алыр: Кызыл хоорай, Эки турачылар кудумчузу, б. 18, Улусчу банк, 2-ги каът, «Тыва Республиканың сайгарлыкчы чорукту деткиир фонд» микрочээли компаниязы, тайылбыр алыр телефон: 8(39422) 3-62-02, e-mail: bsf-tuva@mail.ru.
Киржикчилер тарылгалар сертификадын база эмчи дептерин ап алыр.