Токиога эрткен XXXII Олимпий оюннарының хүлер медалының эдилекчизи Артас Санаага Тыва Республика орденин тывыскан

02.09.2021 Токио-2020 Олимпийжи оюннарда хүлер медальды чаалап алган, Казахстанның чыынды командазының составының кежигүнү Артас Санааны Тывага байырлыы-биле уткаан. Кызылдың аэропортунга ооң төрээннери, эш-өөрү, спортчулар база МИЧ төлээлери чыылган. Ол хүн олимпий чемпиону элээн ужуражылганы кылган. Тываның Баштыңының албан-хүлээлгезин күүседип турар Владислав Ховалыг чазак бажыңынга мөге-биле ужуражып, дээди күрүне шаңналы – Тыва Республика орденин тыпсып, чер участогунуң сертификадын тудускан.
Артас Владислав Ховалыг-биле ужуражырда, өөнүң ишти Анжелика, ийи оглу, ада-иези Валентин Александрович база Кара-кыс Биче-ооловна, баштайгы тренери Артур Кууларович Делгер-оол-биле келген. Республика Баштыңының албан-хүлээлге күүседикчизи тыва олимпийжи мөге-биле ужурашканын бодунуң блогунда сонуургаткан.
Ужуражылга чылыг-чымчак байдалга, эң-не онза сактыышкыннарны арттырып, чаңгыс тыныш-биле эрткенин В. Ховалыг бижээн. Олимпийжи медальды хензиг кезектерге үүрмектеп үлээр-даа болза, бодунуң үезинде аңаа дузалажып, деткип турган кижилерге безин четпес дээн, Артастың сөстери Владислав Ховалыгның сагыш-сеткилинге дыка дегген. Мөгениң ол сөстери кижилерни үнелеп, оларга четтиргенин илередип билир мөзү-бүдүштүүнүң бадыткалы.
Спортчу шаңналдың дээдизин чедип алган алдар-аттыг спортчу кадыг-даа улуургаан сеткил чок, дыка бөдүүн аажы-саңныг. Олимпиадада өске күрүне дээш хүрежип турар деп билзе-даа, сагыш-сеткилинден ол дээш аарып, деткип турган чаңгыс чер-чурттугларынга четтиргениниң сөстерин чаңгыс эвес катап илереткен. Төрээн чериниң айызаан күчү-күжү аңаа хей-аътты берип чоруурун Артас билир.
Владислав Ховалыг мөгениң бодунга база өг-бүлезинге, ооң дагдыныкчызынга чаңгыс чер-чурттугларының мурнундан өөрүп четтиргенин илереткен. Спортту октапкаш, белеткелдерже барбайн барган үелер тургулаан, тура-соруктуун салбайн, катап хүрежип эгелээрин Артур Делгер-оолович албадапкан.
Ужуражылга төнчүзүнде, Тываның Баштыңы албан-хүлээлгени түр када күүседип турар В. Ховалыг мөгеге дээди күрүне шаңналы – Тыва Республика орденин тывыскан. Чаптанчыг ийи оолдуг аныяк өг-бүлеге чер участогунуң сертификадын база берген.
Артастың бирги тренери – көдээ оолдан олимпийжи мөгени кижизиткен Артур Делгер-оолга “ТР-ниң алдарлыг тренери” атты тывыскан.
Алдар-аттыг спортчу Тывазының кожууннарын база спортчу объектилерин кезип, спортчулар-биле ужуражыр планныг. Ол чоруп чорааш, бичии оолдар, кыстарга чагыг-сүмезин берип, арга-дуржулгазын дамчыдары эң чугула деп, Владислав Ховалыг чагаан.