Тывада "Тыва - синема" конкурска киржир чагыгларны хүлээп эгелээн

24.08.2021 "Тыва - синема" V республика конкурузунче киновидео тырттырынга сонуургалдыгларның чогаадыкчы ажылдарының сөөлгү ийи чылда дараазында темаларга тырттырган кыска хемчээлдиг киноларын хүлээп эгелээн: "Эртем болгаш технологиялар", "ТАР-ның тургустунганындан бээр 100 чылдааны", "Хостуг тема". Чагыгларны 2021 чылдың сентябрь 13-ке чедир хүлээр.
Россияда Эртем болгаш технологиялар чылынга база Тыва Арат Республиканың тургустунганындан бээр 100 чылынга тураскааткан конкурсту Тыва Республиканың Культура яамызы деткээн. А Республиканың Улусчу чогаадылга болгаш дыштанылга төвү - конкурстуң организатору.
Ведомствозундан хамаарылга чокка, Тывада чогаадыкчы коллективтер, каттыжыышкыннар база аңгы авторлар конкурска киржип болур. Киржилге – халас.
Киноларның хевири болгаш хемчээли:
- ойнаашкынныг фильм (15 минута четпес);
- барымдаалыг фильм (15 минута четпес);
- социал ролик (15 минута четпес);
- анимациялыг фильм (15 минута четпес).
720х1080 хемчээлге тырттырган киноларны MP4 b full HD хевирге хүлээп алыр. Кино үезинде таакпылаан, арага, эзиртир суксуннар, пиво ижип турар, наркотиктиг болгаш психотроптуг бүдүмелдер ажыглап турар кадрлар турбас ужурлуг. Конкурс ажылдарын катап эгитпес. "Тыва - синема" конкурска ооң мурнунда киржип турган киноларны база роликтерни хүлээвес.
Конкурс киржикчизи кижи фильмографтыг карточка-чагыгны база видеоматериалын (фильмин) "Тыва - синема" деп демдеглээш, сентябрь 13-ке чедир @rcntd@mail.ru почтаже чорудар.
Электроннуг хевирже шилчиткен конкурс видеоматериалдарын дараазында адресте хүлээп турар: Кызыл хоорай, Щетинкин-Кравченко, кудумчузу, б. 46, телефоннар - 2-10-14, 8-923-558-1856.