Тывада хөй ажы-төлдүг 3222 өг-бүлени «социал» хөмүр-биле хандырар

19.08.2021 Одалга сезону эгелевээнде, «Социал хөмүр» социал төлевилел-биле хөй ажы-төлдүг 3222 өг-бүлени хөмүр база 175 өг-бүлени ыяш-биле хандырар деп, регионнуң Одалга болгаш энергетика яамызы дыңнаткан. Бо неделяда одаар чүүлдү дүжүрүп эгелээр.
Тываның көдээ суурларында чурттакчылар социал төлевирлерден аңгыда, күрүне деткимчези кылдыр одаар хөмүрнү азы ыяшты 2016 чылдан бээр ап турарлар. Эге баштай "Социал хөмүр" төлевилелди беш азы оон көвей ажы-төлдүг өг-бүлелерге дээш эгелээн. А 2020 чылдан эгелеп, назы четпээн дөрт ажы-төлдүг, эвээш орулгалыг өг-бүлелерге чылда бир катап “социал хөмүрнү” база дүжүрүп берип турар.
Бо чылын хөй ажы-төлдүг өг-бүлелерге шупту 3 047 тонна хөмүрнү база 840 куб ыяшты дүжүрер. Кожуун чагыргаларының күш-ажыл болгаш социал дуза эргелелдери дуза алыкчыларының чурттап турар черлеринге хөмүрнү азы ыяшты чедирерин организастаар. Тываның Одалга болгаш энергетика яамызы-биле керээ езугаар, сөөртүкчү одаар чүүлдү одалга сезону эгелевээнде чедирер ужурлуг. Сооктар дүшкүжеге өг-бүлелер чурттап турар чериниң аайы-биле, 2145 кг хөмүрнү, азы 4,8 куб ыяшты алыр.
Республика чазаа дуза алыкчыларының санын чыл санында ам-даа көвүдедир сорулгалыг. 2017 чылда 718, 2018 чылда — 1061, 2019 чылда — 2032, 2020 чылда 3085 өг-бүле дузаны алган болза, бо 2021 чылда 3222 өг-бүле “социал хөмүр” деткимчезин алыр.