Тываның Баштыңының соңгулдаларынче бешки кордакчы бүрүткеткен

11.08.2021 Тываның Соңгулда комиссиязы республика баштыңының соңгулдаларынче база бир кордакчыны – орус болгаш тыва дылдар башкызы, КПРФ партиядан Чойгана Седен-оолду бүрүткээн. Ол ам бешки кордакчы болуп турар.
"Чаңгыс демниг Россия" партиядан, Тываның Баштыңы албан-хүлээлгени түр када күүседип турар Владислав Ховалыг , “Өзүлде партиязындан” Андрей Сат, "Россияның коммунистери" партиядан Владимир Чесноков база “Ногааннардан” Айланмаа Кан-оол ооң мурнунда бүрүткелди алган. ЛДПР-ден Виктор Попов база РФ-тиң Казактар партиязындан Олег Пономаренко бүрүткелди эртпейн барганын, ТСК-ның сайтызында дыңнаткан.
Тываның Баштыңынче база Күрүне Думазының депутадынче соңгулдалар сентябрьның 17-19 хүннеринде болуп эртерин сагындыраал. Бадылаашкынны үш хүн ишти эрттирер арга-дуржулга Тыва Республикада бар: эрткен чылын, база-ла амгы үеде ышкаш, хааглыг черлерге хөй кижилер чыгбас, социал дистанцияны сагыыр дээн пандемияга удур кызыгаарлаашкыннар үезинде ол эрткен.
Республиканың шупту девискээр участоктарынга доктаамал видеохайгааралды организастаар.
Бир эвес хамааты кижи бадылаашкын хүнүнде чурттап турар черинге турбас дээр болза, чеде бээр чериниң аайы-биле соңгукчулар даңзызынче ону киирер дугайында билдиришкинни тус черде соңгулда комиссиязынче киирер эргелиг. Шак ындыг билдириишкинни соңгулда комиссиялары, МФЦ база Күрүне ачы-дузазының порталы таварыштыр кирип болур.