«Кадык камгалалы» национал төлевилел шугуму-биле алган чаа эмнелге дериг-херекселдериниң ачызында Тывада ыжык аарыгларындан чок болур чорук 5,5% кызырылган

06.08.2021 Тывада республиканың онкология диспансеринде “Кадык камгалалы” национал төлевилел боттаныышкыны-биле, ыжык аарыгларын эмнеп, шинчиир эң сөөлгү үениң эмчи дериг-херекселдери келген.
Бо чылдың январь 1-ден эгелеп, 12 аңгы эмчи дериг-херекселдерин 2687 катап ажыглааны бүрүткеттинген. Оларның ачызында,  бо чылдың бирги чартыында, 100 муң чурттакчы чонга онааштыр ыжык аарыгларындан чок болур таварылга 5,5 хуу кызырылган.
Республиканың онкология төвү чеди айның дургузунда, тускай мультиспиральдыг компьютер томогравын 800 катап, портативтиг Узи аппараттарын, өрээлдерже көжүрүп болур рентген-аппаратты 400 хире катап ажыглаан. Рокус-АМ радиохерел аппарадынга 60 аарыг кижи эмнээшкинни алган. Август 1-ден брахитерапия аппарадын ажылдадып эгелээн.
Тываның кадык камгалал сайыдының оралакчызы Айдың Сарыглар, бедик технологиялыг эмчи аппаратуразы мага-ботта ыжык аараан черни чиге тодарадып, консультация алырда Россияның башкарыкчы онкологтары-биле харылзажыр арганы берген деп демдеглээн.