Россияның кадык камгалал яамызының эксперттери Тываның кадык камгалал тургузуунуң ажылынга үнелелди берген

05.08.2021 Тыва Республиканың Баштыңы албан-хүлээлгени күүседип турар Владислав Ховалыгның даалгазы-биле, Кадык камгалал яамызының чалааны эксперт эмчилери эрткен субботадан бээр Тывада ажылдап турар. Россияның Кадык камгалал яамызының ведомствозундан үш регион – Москва, Чита база Приволжье облазындан специалистер келген. Нарын эпидемиологтуг байдалдарда республиканың кадык камгалал системазының канчаар ажылдап турарын эксперттер хынааш, аңаа үнелелди берген.
Читаның күрүнениң медицина академиязының анестезиолог-реаниматолог эмчизи Константин Шаповаловтуң чугаазы-биле алырга, республика эмчилериниң бедик белеткелдиин база эмнелге организацияларының техниктиг чепсеглээшкинин делегация демдеглээн:
- Республиканың эмчилериниң ниити ажылы база чаа билиглерже чүткүлү бедик үнеледивис. Республиканың кадык камгалал системазында күчү-күш база курлавырлар бисти кайгатты. Россияның регион бүрүзү мындыг чүүлдери-биле мактанып шыдавас. Аарыг кижилер эмнээринге чугула херек дериг-херекселдер-биле бүрүн четчелеттинген хөй ажыл-чорудулгалыг эмнелге төвүн онзалап айтып тур бис.
Эмчилер делегациязы хөй ажыл-чорудулгалыг чаа эмнелге корпузундан аңгыда, республиканың өске эмнелгелеринге база четкен.
Николай Пирогов аттыг Россияның национал шинчилелдиг медицина университединиң анестезиолог-реаниматолог эмчизи Муслим Курашинов, тыва реаниматологтар төптүң эмчилеринден дудак чок тур деп демдеглээн.
Ол ышкаш Кадык камгалал яамызы-биле Тываның Чазаа республика эмнелгелерни чугула дериг-херекселдер-биле четчелээр планда дээштиг ажылдыын демдеглээн.
Читаның күрүнениң медицина академиязының инфекционист эмчизи Альвина Емельянова Тываның эмнелгелеринде ажылдың чурумнуун чугаалаан. Регионнуң биче ажылдакчылардан эгелээш, эмчилерге чедир эмчи дузазын көргүзер дээш, аарыг кижилерниң назы-харындан хамаарылга чокка, демниг ажылдап турарын сонуургадым. Мында аарыг кижи бүрүзүнге хамаарылга тускай-дыр.
Приволжьениң шинчилелдиг медицина университединиң эпидемиолог эмчизи Ольга Ковалишена республикада аарыг кижиге дуза көргүзеринче бүгү-ле күштерни болгаш аргаларны хаара тутканын демдеглээн:
- Республикада чаңгыс эвес эмнелгелерни хынап кезидивис, регионнуң Кадык камгалал яамызының шупту күштери болгаш аргалары хаара туттунганын көрдүвүс. Система эпидемиологтуг айыыл чок чорукту хандырар дээш, шын болгаш шынарлыг ажылдап турар-дыр. Эпидемиологтуг айыыл чок чоруктуң айтырыглары ындыг-ла кончуг тайбың эвес, экижидип, өскертир чүүлдер Тывада база бар, а ону чедип алыр дизе, республикада амгы эпидемиологтуг байдалды экижидер апаар. Дезинфекция ажылдарын автоматчыдар дизе, агаар арыглаар болгаш дезинфекциялаар дериг-херекселдерни садып алырын республиканың Кадык камгалал яамызынга сүмеледивис. Эвээш чурттакчылыг черлерде хөй санныг аарыг кижилерни чыттырар планда, Тываның арга-дуржулгазын өөренип, шиңгээдир бис.
Ужуражылганың төнчүзүнде, фтизиопульмонология база халдавырлыг аарыглар шинчилээр национал медицина төвүнүң инфекционист эмчизи Елена Савченко эмчи дузазын алыры аарыг кижиниң бодундан хамааржыр деп айыткан:
- Ам чондан дуза херек. Аргалыг болза, кижи бүрүзү тарыдып алыры күзенчиг. Шак ынчалдыр, биске база бодуңарга дузалажыңар. Ынчангаш чурттуң кол специалистериниң сүмелерин дыңнап, дүрген тарыдып алырыңар деп, кыйгырдым.