«Кадык камгалал» нацтөлевилел шугуму-биле Тыва көжүп чоруур ФАП-тарны алган

03.08.2021 Тываның Баштыңының албан-хүлээлгезин түр када күүседип турар Владислав Ховалыг республиканың кадык камгалал адырында чугула болуушкуннуң дугайында бодунуң блогунда бижээн:
«Көжүп чоруур ийи фельдшер-акушер пунктулары Тываның Кадык камгалал яамызында келген. РФ-тиң кадык камгалал сайыды Михаил Альбертович Мурашко-биле ооң дугайында дугуржуп чугаалашкан улус бис. Артып каан, дугуй кырында ФАП-тар республикага бо чоокку үеде келирин манап тур бис. Чаа машиналар тускай автопаркты четчелеп, стационарлыг эмнелге албан черлери чок, чедери берге черлеривисти хандырып эгелээр».
Тываның Кадык камгалал яамызының медээзи-биле алырга, “Кадык камгалалы” национал төлевилелдиң “Бирги эмчи-санитар дузазын көргүзер системаны хөүгжүдери” федералдыг төлевилел чорудуу-биле, бо чылдың төнчүзүнге чедир республикага 21 көжүп чоруур эмчи комплекизи келир.
Медицина техниказының бүдүрүкчүлери-биле бөгүнде 168338,80 муң рубль ниити түңнүг күрүне керээзин чарган.
Газель Next база Садко Next автомобильдерде «Гинекология» комплектилиг көжүп чоруур ФАП-тарны фельдшер биле чолаачыга, херек апарза эмчизинге база кылдыр ажылдап кылган. Комплексти херек бүгү-ле дериг-херекселдер-биле четчелеп дерээн. Аңаа-ла хан анализтерин ап, чижээ чигирниң базха холестеринниң деңнелин үндүрүптер.
Фельдшер компьютержиттинген ажылчын олудунга шупту эмчи документилерин электроннуг хевирге долдургаш, ниити медээлер баазазынче чорудуптар.
“Флюорограф” база “Маммограф” автомобильдерде докторга база лаборантыга автоматчыткан ажылдаар олуттарны тускайлаан. Эмнелге дериг-херекселдери-биле четчелеттинген, доктар билбес машиналар Тываның ыраккы болгаш чедери берге Мөңгүн-Тайга, Тожу, Тере-Хөл кожууннарын хандырарр.
Тываның кадык камгалал системазының бирги чадазында эмчи дузазының шынарын болгаш чедингирин хандырарынга “Бирги эмчи-санитар дузазын көргүзер системаны хөүгжүдери” төлевилел улуг салдарлыг.