Тывада «Каргыраа – 2021» ырактан киржир делегей чергелиг мөөрейни чарлаан

28.07.2021 Тыва культура төвү Тыва Республиканың Культура яамызының деткиишкини-биле, Кыргыс Соруктунуң 120 харлаан юбилейинге, Тыва Арат Республиканың тургустунганындан 100 чылдаанынга, Эрзин кожууннуң 80 чыл болган юбилейинге база Тыва Республикада Хѳѳмей хүнүнге тураскаадып, «КАРГЫРАА – 2021» ырактан киржир делегей чергелиг мөөрейни эрттирерин  чарлаан.
Тыва хөөмей күүселдезиниң «КАРГЫРАА-2021» делегей чергелиг мөөрейи тыва хөөмейниң каш янзы хевирлерин кадагалап, ону улам сайзырадыр сорулгалыг.
Мөөрейге 18 хардан өрү назылыг, күзелдиг кижи бүрүзү киржип болур. Мөөрейге киржир чагыгларны база видеоматериалдарны 2021 чылдың август 13-ке чедир хүлээп алыр. Мөөрейниң дүрүмүнде айыттынган негелделер езугаар бодунуң чогаадыкчы күүселдезин видеога тырттыргаш, tuvancenter@gmail.com электроннуг почтаже чорудар.
Мөөрей талазы-биле информацияны Тыва культура төвүнүң социал четкилерде база албан чериниң https://tuvancenter.ru/ сайтызында салган дүрүмден көрүп, таныжып болур.
Сонуургаан айтырыгларыңар бар болза, +7 (394 22) 2-35-71 телефондан (специалистер килдизи), 8-983-516-31-97, координатор Монгуш Адыгжы Кузен-ооловичиден билип ап болур.