Тывада «Кадык камгалал» национал төлевилел чорудуу-биле 1046 аарыг кижи халас эмнерни алган

26.07.2021 “Кадык камгалалы” национал төлевилелдиң “Чүрек-дамыр аарыглары-биле демисел" угланыышкынында Тыва эрткен чылга деңнээрге 3 млн рубль хөйге, азы 19398,78 муң рубль акшага эм-таңны алыры планнаттынган.
Бо хүнде ол акша-хөреңги бүрүн шиңгээттинген, чүрек-дамыр аарыг кижилерге бүдүн чылда херек эмнер аймаа саттынган. Регионнуң хан-дамыр төвүнге эмнедип, кезиишкин эрткен болгаш ооң диспансер хайгааралында аарыг кижилерни аар өртектиг эмнер-биле хандырары көрдүнген. 2021 чылдың 6 айларының иштинде чартыктаан, баш-мээниң хан эргилдези шын эвес апарган, чүрек-дамыр системазында кезиишкиннер эрткен 1046 аарыг кижиге 5883,6 муң рубль акша түңүнге халас эмнер алыр 3822 рецептини берген.
Тыва Республиканың Кадык камгалал яамызының штаттан дашкаар кол кардиологу Диана Сувандии, стационарга эмнээшкин соонда үндүр бижипкенде, инфаркт болгаш инсульт катап болу бербезин дээш, амбулаторлуг эмнениринге эмнер-биле хандырылга кол черни ээлээрин чугаалаан. Эмчизиниң бижип бергени аар өртектиг эмнерни кижи бүрүзү садып шыдавас турган, бо программа чүрек аарыг чамдык кижилерни халас эмнер-биле хандырар арганы бээр. «Чүрээ кемниг” кижилерни, бир эмниң өртээ 15-20 муң чедип турар аар өртектиг эмнер-биле хандырып эгелээрге, республикада чүрек-дамыр аарыындан халажырап чоруур кижилерниң хорап, чок болурунуң саны эвээжээр ужурлуг” - деп, республиканың Кадык камгалал яамызының кол “чүрек эмчизи” санап турар.