«Азия төвүнде фанфарлар-2021» үрер хөгжүм оркестрлериниң III делегей фестивалы Тывада эртип турар

Фестиваль Кызыл хоорайның элээн каш шөлчүгештеринге июнь 5-ке чедир уламчылаар. Фестивалдың хемчеглеринде конкурс программалары болгаш концерттерден аңгыда, “төгерик столдар”, хүндүлүг аалчылар-биле чогаадыкчы ужуражылгалар, парлалга конференциязы кирген. Кол оюн көргүзүглер В. Көк-оол аттыг Национал хөгжүм-шии театрының сценазынга база Арат шөлүнге болур. 

Делегейде ады-сураа алдаржаан хөгжүмчүлер - делегейде тергиин дээн валторнистерниң бирээзи, композитор, хөгжүм каастакчызы Аркадий Шилклопер база чаа салгалдың башкарыкчы саксофончуларының бирээзи Евгений Новиков фестивальда бир дугаар аалдап келген. Аркадий Шилклопер Кызылдың уран чүүл колледжизиниң студентилери-биле чогаадыкчы ужуражылганы эрттирер. 

Фестиваль Т.Д. Дулуш аттыг Тыва Республиканың Чазааның үрер хөгжүм оркестриниң эгелээшкини база Тыва Республиканың Чазааның, Россия Федерациязының Камгалал яамызының, Россия Федерациязының Культура яамызының база «Валерий Халилов аттыг үрер хөгжүм ниитилели» үрер хөгжүм оркестрлериниң база үрер болгаш соктаар хөгжүм күүседикчилериниң ассоциациязының деткимчези-биле эртип турар. 

«Азия төвүнде фанфарлар-2021» үрер хөгжүм оркестрлериниң III делегей фестивалы июнь 5-ке чедир уламчылаарын база катап сагындыраал. Июнь 1-де Арат шөлүнге үрер хөгжүмнүң байырлалы ажыттынган. Ийиги хүнүнде чогаадыкчы коллективтерниң оюн-көргүзүү - аъттыг көргүзүг, марш-чыскаал, дирижерлар чыскаалы база үрер хөгжүм оркестрлериниң каттышкан оюну болгулаан. 

Бөгүн, азы июнь 3-те, фестивальдың программазында: Т.Д. Дулуш аттыг Тыва Республиканың Чазааның үрер хөгжүм оркестриниң “Дош кырынга хөгжүм” деп программазы Субедей аттыг спорт комплекизинге 12.00 шакта эгелээр. 15.00 шакта Кызылдың президентиниң кадет училищезиниң шөлчүгежинге В.М. Халилов аттыг Москваның шериг-хөгжүм училищезиниң суровчуларының оркестри ойнаар. 18.00 шакта В. Көк-оол аттыг Национал хөгжүм-шии театрынга, делегей конкурстарының лауреады Евгений Новиков (саксофон), концертмейстери – Ильза Сендажының; Абакан хоорайның муниципалдыг концерт үрер хөгжүм оркестриниң концерти болур. 

Июнь 4-те, 18.00 шакта, В. Көк-оол аттыг Национал хөгжүм-шии театрынга – «Азия төвүнде фанфарлар-2021» үрер хөгжүм оркестрлериниң III делегей фестивалының байырлыг хаашкыны болуп эртер. Аңаа Россияның Камгалал яамызының Төп шериг оркестри, В.М. Халилов аттыг Москваның шериг-хөгжүм училищезиниң суровчуларының оркестри ойнаар. Фестивальдың каттышкан оркестрин дирижерлер башкарар. 

А июньнуң 5-те 55-ки мотоадыгжы бригаданың (дагжы) концерт шөлүнге Россия Федерациязының Камгалал яамызының Төп шериг оркестриниң, Т.Д. Дулуш аттыг Тыва Республиканың Чазааның үрер хөгжүм оркестриниң оюн-көргүзүү-биле фестиваль хүннери доостур.