Тываның школаларында халас изиг чемниң бир кижиге өртээн 64,56 рубль чедир өстүрген

 Чаа өөредилге чылында 1-4 класстарның шупту өөреникчилерин халас изиг чем-биле хандырар. Республика бюджединде ол сорулгага 382,2 млн. рубльди тускайлаан. Эге школаның өөреникчи бүрүзүн хүннүң-не ортумаа-биле 64 рубль 54 копеекке (2020 чылда – 60,12 рубль) хүннүң-не изиг эртенги чем азы дүштеки чем-биле хандырыры көрдүнген. Школаның удуртулгазы ада-иелерниң бижимел билдириишкининге даянып, халас изиг чем алыр уругларның даңзызын тургускан. 

Республика Чазааның бадылааны чурум боттарында столовая азы чем кылыр чер чок школаларга, санитарлыг арыг-силиг чурумун сагывышаан, хөй-ниитиниң чемненилге бүдүрүлгелеринден дүштеки чемни алырын чөпшээрээн. Бичии суурларда өөреникчилеринге аъш-чем белеткээрде, тускай мергежилдиг азы эде өөредилге программазын эрткен ажыл чок хамаатыларны хаара тудуп болур. Бир эвес изиг чем кылыр кандыг-даа аргазы чок болза, школачыларның ада-иелеринге бажыңынга изиг чемни белеткээр кылдыр продуктуларны бээр. Бо таварылгада тус чер чагыргазы-биле школаның удуртулгазы уруг изиг чем чиггенин билген турар ужурлуг. Изиг чем орнунга акша компенсациязын бээри доктаалда көрдүнмээн.

ТР-ниң Өөредилге яамызының сан-чурагайы-биле алырга, республиканың 173 школаларында 164 эге класстар бар, оларның 42-зи – эвээш комплектилиг. Ол школалар 1-4 класстарның өөреникчилерин изиг чем-биле хандырып турар. Тывада 151 столоваялар дузазы-биле чемненилгени 95,3 хуу шиитпирлээн. Арткан школаларны изиг чем-биле хандырарын, колдуунда белен кылдыр белеткээн чемнер-биле ажылдаар столоваялар, буфеттер, ол ышкаш хөй-ниити чемненилгезинде хуу сайгарлыкчылар харыылап турар.

Кадыкшыл байдалы кызыгаарлыг 1-4 классчыларны ийи катап чемгерип турарын яамы дыңнаткан. Республикада 2028 ындыг уруглар бар, оларның 559-зу бажыңында өөренип турарлар. Оларны халас изиг чем-биле чемгереринге Тываның 2021 чылда бюджединде 34,2 млн. рубль көрдүнген.