“Сорунза” төлевилел чорудуу-биле тудуг ажылдары эгелээн

Чаңгыс аай хевирлиг культура бажыңнарын алды ай иштинде тудуп доозар. 243 дөрбелчин метр шөлдүг, 120 олуттуг чаа тудугнуң дөзевилелин муниципалдыг тургузуглар удуртукчуларынга дамчыткан. 

Өвүр кожууннуң Дус-Даг, Каа-Хем кожууннуң Эржей база Дерзиг-Аксы, Барыын-Хемчик кожууннуң Бижиктиг-Хая, Бай-Тайга кожууннуң Кара-Хөл, Таңды кожууннуң Кызыл-Арыг, Сүт-Хөл кожууннуң Кызыл-Тайга сумулары тудуг ажылдарынче кирипкен. 

Республика бюджединде 47600,0 муң рубльди төлевилел ажылдарын боттандырары-биле тускайлаан. Ооң 6475,0 муңун - ачы-дуза чедирилгези дээш, 35462,0 муңун - материалдар, 5663,0 муң рублин - дериг-херекселдер садып алырынче планнаан. 

Үстүнде адаттынган кожууннарда ажыл бичиилеп шимчеп кирипкен-даа болза, тудуг материалдарын сөөртүп алырынга Өвүр биле Барыын-Хемчик кожууннар саадап турар.

Муниципалдыг тургузуглардан тускайлаан акша-хөреңги чөптүг ажыглаттынзын дээш, объектилерде тудуг ажылдарын шыңгыы контрольга алыр.