Тывада "Аъттыг шериг марафону" биле "Шериг ралли" маргылдаалары эгелээн

Байырлыг ажыдыышкынга Россия Федерациязының Камгалал яамызының, Төп шериг округунуң база регион чазааның төлээлери киришкен. Тываның Баштыңының албан-хүлээлгезин түр үеде күүседип турар Владислав Ховалыг шериг оюннарның киржикчилеринге болгаш чыылганнарга байыр чедирген:

 «Хүндүлүг, маргылдааның киржикчилери! Республиканың чурттакчы чонунуң мурнундан тыва черде эртип турар маргылдааның киржикчилеринге изиг байыр. 

“Шериг ралли” чарыжының шериг чолаачылар экипажтарының болгаш “Аъттыг шериг марафонунуң” чүък-транспорт кезээниң хууда составтарының ортузунда шериг маргылдааның киржикчилерин хүлээп алыры биске хүндүткел болгаш улуг харыысалга. Бистиң чонувус шериг кижилерге кезээде улуг хүндүткелин илередип, ада-өгбелеривистиң эрткен маадырлыг төөгүзүн камныы-биле кадагалап чоруур. Ада-чурттувустуң амгы камгалакчызы - Россияның Маадыры, камгалал сайыды, чаңгыс чер-чуртуувус Сергей Шойгунуң мурнунга улуг харыысалгалыг бис дээрзин билбишаан, сеткиливистен чоргааранып чоруур бис. 

Тываны  «дугуй кырында республика» деп бо-ла  чугаалай бээр. Ынчангаш техникага, ону башкарарының аргаларынга хамаарылгавыс онзагай. Ооң кадында өгбелерден аът малга ынакшылывыс, аът чарыштарынга хандыкшылывыс салгалдан-салгалче дамчып келген.

Амгы үеде санитарлыг кызыгаарлаашкын турза-даа, бо көрүштүг шериг маргылдааларын эрттирер чаңчыл уламчылап турары, бисти өөртүп тур. Бо маргылдаалар бистиң республикада муң-муң өңнүктерни болгаш мөгейикчилерни тыпкан. Бөгүн, бо шөлде оларның шуптузу чыглып келбээни харааданчыг-даа болза, олар маргылдааның киржикчилери дээш сеткилинден «аарып» турарлар! 

Маргылдааларның бүгү киржикчилеринге чедиишкиннерни күзедим! Амы-хууда билиг-мергежилиңер болгаш команданың бедик хей-аъды күштүглерни Тиилелгеже эккээр болзун! Орууңар менди-чаагай болзун! 

 Майның 24-тен 30 хүннеринде Тыва Республикада бүгү-армейжи “Аъттыг шериг марфону” база “Шериг ралли” маргылдаалары эртип турар. Маргылдааның чүък-транспорт кезээниң киржикчилери 15 ажыг километр узун хемчээлде шаптараазыннарлыг оруктарны эртер. Аңаа чүгле эң шыырак шериг белеткелдиглер шылгарап үнер. 

 А “Шериг ралли” чарыжы дөрт чадага чардынган: бирги чада - “4х4 дугуйлуг чүък автомобильдери” база “6х6 дугуйлуг чүък машиналары” бөлүктерге 124 км орукка хууда чарыш; ийиги чада – “Куяк автомобильдер” экипажтарының от белеткелинге нормативтерни күүседири; үшкү чада –131 км-ге чарыш база дөрткү чадада – 142 км узун хемчээлдиг орукка командалар чарыжының соонда, «4х4 дугуйлуг куяк автомобильдер», «4х4 дугуйлуг чүък автомобильдери» база «6х6 дугуйлуг чүък автомбильдери» бөлүктерде  тиилекчи командалар илереттинер.

 Бүгү-армейжи “Аъттыг шериг марафону” база “Шериг ралли” маргылдааларында 100 ажыг шериг албанныглар, 50 санныг шериг техника болгаш автомобильдер, 50 ажыг тыва аъттар киржип турар. Маргылдааның түңнели-биле тулган көргүзүглүг база бирги черни ээлээн командалар делегей маргылдааларынга Россия Федерациязын төлээлээр. 

 Төп болгаш Мурнуу, Чөөн, Барыын шериг округтары, Агаар-десант шерии, Соңгу шериг-далай флоду болгаш РФ-тиң Национал гвардия шериглериниң командалары шериг оюннар маргылдааларында киржип турарын сагындыраал.