Чазак даргазының оралакчызы – экономика сайыдын томуйлаан

Инвестицияны хөгжүдериниң федералдыг агентилелинге ажылдап турган арга-дуржулгалыг болгаш, амгы үениң механизмнерин регионга ажыглап, экономикага чаа идигни бээр деп, Тываның Баштыңының албан-хүлээлгезин күүседип турар В. Ховалыг демдеглээн. 

Айдыс Александровичиниң күш-ажылчы депшилгези экономика-биле харылзаалыг: бөдүүн специалистен эгелээш, Москва хоорайда “Инвестиция хөгжүлдезиниң агентилели” АКхО-нуң төлевилел инициативаларының даңзызын хевирлээр департаментиниң удуртукчузунга чедир ажылдаан. Аңгы-аңгы структураларга ажылдаан дуржулгалыг, 2019-2020 чылдарда «Россияның лидерлери» бүгү-российжи конкурска киришкеш, мөөрейниң чартык финалынга четкен. 

А.А. Сат 1987 чылда Туран хоорайга төрүттүнген. 2009 чылда Россия Федерациязының Чазааның чанында Саң-хөө академиязынга «Бухгалтер учеду, анализ база аудит» мергежилди чедип алган. 2014 чылда Тываның күрүне университединге «Юриспруденция» угланыышкынга профессионал эде белеткелди эрткен; 2018 чылда РФ-тиң Президентизиниң чанында РАНХИГС-ке «Күрүне болгаш муниципалдыг удуртулга» талазы-биле өөренген; 2019 чылда «Синергия» Москваның саң-хөө-үлетпүр университединге «Биче болгаш ортумак сайгарлыкчы чорук субъектилеринге деткимчени организастаары» угланыышкынга эде белеткелди эрткен. 

Күш-ажылчы базымын Москва хоорайда «Эрнст энд Янг» КХН-ниң аудитор ачы-дуза килдизиниң специализи бооп эгелээн. 2009-2010 чылдарда РФ-тиң Чепсектиг Күштеринге шериг албанын эрттирген. 2011-2013 чылдарда ТР-ниң Экономика яамызының күрүне программалары база инвестициялар хаара тудар килдистиң кол специализи турган. 2013-2016 чылдарда «Связь-Банк» АКБ ААН база «Россельхозбанк» ААН банкыларның филиалдарынга ажылдаан. Республиканың Экономика яамызының удуртур албан-дужаалдарынга 2016 чылдан ажылдап эгелээн, 2018 чылда экономика сайыдының бирги оралакчызынга томуйлаткан. 

2020 чылдан бо хүнге чедир - Москва хоорайда “Инвестиция хөгжүлдезиниң агентилели” АКхО-нуң Инвестиция төлевилелдериниң департаментизиниң төлевилелдер инициативаларының учет килдизиниң начальниги, Төлевилелдер инициативаларының даңзызын хевирлээр департамент удуртукчузу бооп ажылдаан.