Тывада ковидке удур хемчеглер уламчылавышаан

20.04.2021 Россияның хереглекчилерниң эргелерин камгалаар болгаш хайгаараар абанның Тывада эргелелиниң удуртукчузу Людмила Салчак амгы үеде республикада эпидемиологтуг байдалдың дугайында дыңнадыгны чазактың аппарат хуралында кылган. «Чаа коронавирус халдавырындан аарыыр чоруктуң катап көдүрлүүшкүнүн болдурбазы - бо хүнде бирги чергениң айтырыы болуп турар. Ийиде – чаа коронавирустуң халдавырын база ооң мутацияланган чаа хевирин киирбес болгаш ону нептеретпес ужурлуг бис. РФ-тиң девискээрлеринде эпидбайдалды көөр болза, субъектилер аайы-биле аңгы-аңгы. РФ-тиң Чазаа апрельдиң 15-тен авиа аргыжылганы кызыгаарлаар шиитпирни үндүрген. Роспотребнадзорнуң бөгүнгү медээзинден алырга, Россияда британ хевирниң 128, мурнуу африканчы 16 база билдинмес чаа 49 хевир бүрүткеттинген. Европа чурттарында байдал экижий бергижеге, республиканың чурттакчыларынга кызыгаардан үнмезин кыйгырдывыс. РФ-тиң кол санитар эмчизи транспорттап кызыгаардан кирип турар хамаатыларга өскерилгелер кирген доктаалды хүлээп алган. Ол хамаатылар Күрүне ачы-дузазының порталы таварыштыр үш хонук иштинде ПЦР-шинчилелдиң түңнелин алыр чагыгны долдуруп киирер. Роспотребнадзорнуң бистиң республикада эргелели даштыкы чорааш кээп турар хамаатыларга ковидке ПЦР шинчилелдерни салганынга контрольду тургускан. Бо чылдың эгезинден бээр даштыкы чурттардан 482 кижи келген, оларның аразында Турциядан келген кижилерниң 295-и - улуг база 59-у - уруглар. Лабораторлуг шинчилелдериниң түңнелдерин салбаан 88 хамаатыга онааштыр протоколдарны долдурган». Сөөлгү үеде чамдык организациялар ковидке удур хемчеглерни кошкатканын Людмила Салчак демдеглээн. Чижек кылдыр Чеди-Хөл кожуунну адап, сөөлгү 14 хонукта аараан кижилерниң саны ында немешкенин айыткан. Хову-Аксы суурда Чеди-Хөл кожуун чагырга бажыңында, МФЦ-де, поликлиникада, төп кожуун эмнелгезинде, кафеде, садыгларда хажыдыышкыннар бары илереттинген. Санитайзерлер чок, кабинеттерде маска чуруму сагыттынмайн база бар рециркулярларны ажыглавайн турар. Ковидке удур хемчеглерни удуртукчулар таарыштырбайн турар. Аарып турар кижилерниң көвей кезии ажыл чоктар база пенсионерлер. Аарыгның өзүлдези 44,4% четкен. Чер-черлерге чогуур контрольду хандырарын сүмелээн. РФ-тиң девискээринде безин маска чуруму ам-даа чоруп турарын сагындыргаш, рейд хемчеглерин күштелдирерин санитар эмчи айыткан. Социал ырак чурумну тудуп, ажылдаар черлеринге база бажың-балгадынга дезинфекцияны ам-даа чорудары күзенчиг. Чоннуң кадыкшылын камгалаарынче угланган хемчеглерге элээн шыңгыы болурун Людмила Салчак айыткан. Тарылга пунктуларын немей ажыткан, план 21,7 хуу күүсеттинген. « 60+ назы-харлыг кижилерни тарыышкын пунктузунче аай-дедир чедиреринге тускай транспортту тургузарынга Кызыл хоорай мэриязының дузазы херек» - деп, Роспотребнадзорнуң удуртукчузу түңнээн.