Аварийлиг чуртталга бажыңнарындан хамаатыларны өскээр көжүрер программаның күүселдезинге чазак хуралы болуп эрткен

Тыва Республиканың Баштыңының албан-хүлээлгезин түр када күүседип турар Владислав Ховалыг республика девискээринде аварийлиг чуртталга фондузундан хамаатыларны өскээр көжүрер программа күүселдезиниң дугайында хуралды эрттирген. 

Хуралга чазак дарганың оралакчызы Александр Брокерт, тудуг болгаш ЧКА сайыды Аяс Хунай-оол, саң-хөө сайыды Орлан Достай, чер болгаш өнчү хамаарылгаларының сайыды Иван Ултургашев, «Күртудугчагыг» ТР ККА-ның директору Айхан Хомушку, Кызыл хоорай мэриниң эрге-хоойлу айтырыглары база профилактика талазы-биле оралакчызы киришкен.

“Чурттаттынмас чуртталга фондузунуң санын кызырарын хандырары” регион төлевилели база аварийлиг чуртталга фондузундан хамаатыларны өскээр көжүрер республика программазының күүселдезиниң дугайында дыңнадыгны тудуг сайыды Аяс Хунай-оол дыңнаткан. Аяс Владимирович тудуг организацияларының мурнунда ажылдарны айтып, чамдык объектилерин доозар дээрге кандыг шаптараазыннар барын чугаалаан. 

«Орион», «Энергострой», «Өлчей», «Угулза», «Атлант» тудуг организацияларын база хуу сайгарлыкчы Алексей Самчанны ажыл-агыйжы айтырыгларны шиитпирлээри-биле хуралче чалаан. 

“Чурттаттынмас чуртталга фондузунуң санын кызырарын хандырары” программа-биле 2021 чылда ийи муниципалдыг тургузугда 49 өг-бүлени 2494,5 дөрбелчин метр шөлче көжүрери планнаттынган. Кызыл хоорайда база Чеди-хөл кожууннуң Хову-Аксы суурда ийи бажың туттунуп турар. Кызыл хоорайның Московская кудумчузунда объект 80 хуу белен, амгы үеде иштики ажылдар чоруп турар. Хову-Аксы суурда Юбилейная кудумчузунда тудуг объектизи чүгле 10 хуу кылдынган: таваан кудуп, ханаларын салып үндүреринге белеткел доозулган.

83,47 муң дөрбелчин метр шөлче 6383 кижини, азы 2235 өг-бүлени аварийлиг чуртталга бажыңнарындан өскээр көжүрер. Бо үеге дээрге 4820 кижини азы 1653 өг-бүлени көжүрүп, программаны 74% күүсеткен. Ам-даа 83,47 муң дөрбелчин метр шөлче 6383 кижини, азы 2235 өг-бүлени көжүрери арткан. 

Московская кудумчузунда 121, 122, Иркутская кудумчузунда 2, 3, 4, 6, 18, 20, Убсу-Нурская кудумчузунда хөй квартираларлыг 9 бажыңче хамаатыларны көжүргеш, ам солчурунуң/хөлезилээриниң керээлерин чарып турар. 2021 чылдың төнчүзүнге чедир амгы үеде тудуп турар 14 бажыңнарның (Кызылда – 8, Хову-Аксында – 6) 11-ин ажыглалче киирип, 771 кижини ниити 10,31 муң дөрбелчин метрлиг оран-саваже көжүрер. 

Владислав Ховалыг хуралдың төнчүзүнде, Кызыл хоорай мэриязының база Күртудугчагыгның удуртулгазынга программа-биле тудуп турар бажыңнарның шынарынче кичээнгейни салырын, айыттынган объектилерде ажылдарны шапкынчыдарын, даштыкы четкилерге кожар ажылдарны уламчылаарын дааскан.