Тыва Республиканың Хөй-ниитиниң кадыкшыл төвүнде чаа удуртукчуну томуйлаан

Ооң мурнундагы Медицина профилактиказының төвүнүң ажыл-чорудулгазынче чаа угланыышкыннарны кирип, ынчаар эде адаан. Чаартынган төп ковид халдавырының айыылының үезинде халдавырлыг эвес аарыгларны эвээжедир болгаш чаа коронавирус инфекциязы чыпшынганда хоочураан аарыгларның каданнаарын болдурбас хемчеглерни ап чорудар. 

Сайыт ужуражылга үезинде, төпке доктаамал кээп турарын, а яамының специалистери тускай сорулгалыг көргүзүглерниң күүселдезин доктаамал хайгааралга алырын дыңнаткан.

“Кадыкшылдың оруу” губернатор төлевилели төптүң баазазынга ажылдаар, а Covid шинчиир болгаш эмнээр амбулаторлуг төп өске эмнелге организациязынче шилчээн. 

Кадык камгалал адырында хөй чылдарда ажылдаан байлак арга-дуржулгалыг, бедик билиг-мергежилдиг организатор Белекмаа Доржуевна Монгушту чаартынган төптүң удуртукчузунга томуйлаанын сайыт Артыш Сат таныштырган. 

Аарыгларны болдурбазының чаа арга-хевирлерин ажыглаар кылдыр специалистерни өөредиринге дузаны кадарын Белекмаа Монгуш сайыттан дилээн. Төптүң бирги организастыг хемчеглери чоруттунганын, албан чериниң хүлээлгелери специалистерде хувааттынганын ол дыңнаткан. 

Тыва Республиканың Баштыңының ТР-ниң Дээди Хуралынга (парламентиге) чылдың-на бээр айыткалы-биле, Хөй-ниитиниң кадыкшыл төвү ажыттынганын сагындыраал.