Тываның Баштыңы малчыннарны деткиир арга-хевирлерни сайгарып чугаалашкан

“Чаңчылывысты уламчылаар бис. Чазак кежиүгүннери база тус чер чагыргаларының удуртукчулары кожууннар аайы-биле хуваажып алыр” - деп, Шолбан Кара-оол бодунуң оралакчызы Валентин Енданга ажылды дүүштүрерин дааскан. 

Республика Чазааның кежигүннериниң Шагаа байырлалының бүдүүзүнде малчын коданнарда көдээ ишчилерни эргий кезип, чолукшууру - Тывада чаагай чаңчылдарның бирээзи. Ылаңгыя чедери берге ыраккы кыштагларже онза кичээнгейни углаар.

 «Ындыг кыштагларывыс саны 334 – деп, Шолбан Кара-оол чугаалаан. – Шупту 3277 кыштагның 10 хире хуузу». Ай санаашкыны-биле Чаа чыл февраль 12-де дүжерин республика баштыңы чугаалаан. «Мал кыштаглаашкыны амдыызында хүр, малывыс баш саны 20,7 муң башка немешкен азы 107 хуу болган” – деп, Шолбан Кара-оол чугаалаан. 

Чаа коронавирус халдавырынга удур санитар-эпидемиологтуг бүгү-ле негелделерни ылап сагыырын Тываның Баштыңы негээн. «Үнүүшкүннер кылыры байырлаары эвес-тир – дээш, Шолбан Кара-оол эмчилерни база ветеринарларны эвилелдээрин сагындырган. – Малчын турлагларже үнүүшкүннер ажыктыг болурун чедип алыр». 

Тываның Баштыңы үнүүшкүннер үезинде малчыннарга кандыг дуза херегин чугаалажырын сагындырган. «Ажыл-ишчи кижилерни деткииринче угланган арга-хевирлерни ажыглаар, аъш-чемни, белек-селекти чедирер” - деп Шолбан Кара-оол чугаалаан.