Тываның Чазааның саң-хөө-экономика адыры саң-хөө чылын канчаар доосканын чугаалашкан

 Саң-хөө сайыды Орлан Достай тускай сорулгалыг субсидиялар база бюджеттер аразының өске-даа трансферттери-биле 13 млрд. 853 млн. рубль азы 87,7 % акша шиңгээттингенин дыңнаткан.  

Националдар херектериниң талазы-биле агентилел, Чер болгаш өнчү-хөреңги яамызы, Кадык камгалал яамызы, Өөредилге болгаш эртем яамызы, Көдээ ажыл-агый болгаш аъш-чем яамызы, Бойдус яамызы, Социал политика болгаш күш-ажыл яамызы, Экономика яамызы, Тудуг яамызы – бо бүгү черлерге бо чылда көрдүнген федералдыг акша-хөреңгиниң шиңгээдилгезин контрольга алырын сүмелээн. 

Пятницада муниципалитеттер даргалары-биле кады шупту муниципалитеттер, ооң иштинде Кызыл хоорайга хамаарыштыр дүүштүрүлгени чоруткан. Бирги ээлчегде декабрьның шалың акшазын төлээр ниити сорулганы салган.  

«Эштер, чагырга даргалары, боттарыңнарның саң-хөө албаннарыңарның ажылынче кичээнгейни углап, кожуунуңарда саң-хөө органнарының удуртукчуларның ажыл-чорудулгазын көрүңер. Эрткен чылда ортумак шалың 33600 рубль турган болза, бо чылда ол 35800 акша. Ортумак шалың 2 муң рубльга өскени ол. Дүүштүрер кылдыр, албан черлериниң айда ортумак санаашкыннарын хынаңар. Кайда шын эвес, эрттир санаашкыннар дээш, өске-даа чүүлдер барын көрүп көрүңер. Ол ышкаш эң кол чүүл – эмчи ажылдакчыларынга немелде төлевирлерже кичээнгейни углаңар. Айыттынган категорияның ажылдакчылары бар албан черлерин онза кичээнгейге алыр” – деп, саң-хөө сайыды Орлан Достай коллегаларынга болгаш муниципалдыг удуртукчуларга сагындырган.