Тываның Баштыңы эмчилерге чаа тускай машиналарны дамчыткан

Эмнелге албан черинге автомашиналарны дамчыткан бөгүнгү езулалга киришкен республиканың Баштыңы Шолбан Кара-оол ооң дугайында бодунуң блогунда бижээн. 

«Бистиң эмнелге албан черлеривистиң коронавируска удур демиселин быжыглаар дээш, дүрген дуза чедирилгезиниң 10 чаа автомобилин бөгүн алдывыс. Россияда бүдүрүп турар Форд Транзит, УАЗ Патриот база ГАЗ Некст билдингир маркаларда кылган тускай машиналар болур. Республиканың 1 дугаар эмнелгезинге база халдавырлыг аарыглар эмнелгезинге 1-1 «форд», а дүрген дуза болгаш медицина катастрофаларының төвүнге – ийи Патриотту база алды ГАЗельди дамчыттывыс. Амы-тынны камгалаар дээш чаңгыс-даа секунда чидип болбас, ынчангаш эмчилерге дүрген чоруктуг хөлге херек. Чаа халдавырдан дүрген камгалаары – чедиишкинниң чедиишкини ында» - деп, ол бижээн. 

Шолбан Кара-оол бөгүн-не кыйгыртыышкыннарже чаа автомобильдери-биле үнүптер эмчилер бригадазынга чедиишкиннерни база кадыкшылды күзээн. 

РФ-тиң Чазааның № 1066-р айтыышкыны езугаар, Тыва-биле кады, чурттуң 85 регионнарынга дүрген дуза чедирер 1258 машинаны үлээн.