Тываның Орук-транспорт яамызының удуртулгазы “Айыыл чок болгаш шынарлыг автомобиль оруктары” национал төлевилел чорудуу-биле кылдынып турар орук ажылдарын хынаан

Ажылчы бөлүктүң совтавында Тыва Республиканың орук-транспорт комплекизиниң сайыдының оралакчызы Шораан Чыргал-оол, Кызыл хоорайның мэриниң оралакчызы Черноусов А.Н. база «Тываавтодор» ККА-ның ажылдакчылары олар хоорайның 4 объектилеринге четкен. 

Неделя санында национал төлевилел күүселдезин хынап турар. Бо неделяда ажылчын бөлүк Ровенская, Тиилелгениң 75 чылы, Полевая база Титов кудумчуларын хынаан. 

Титов база Тиилелгениң 75 чылы кудумчуларда белеткел ажылдары чоруп турар. А Ровенская биле Полевая кудумчуларда ажылдар көскү, асфальт салыры уламчылавышаан. 

«План езугаар ажылдар үргүлчүлевишаан. Чамдык объектилерде ажылдың түңнелдери көскү. Оруктарда ажылдар хүннүң-не уламчылап турар. Ажыл чурумун график езугаар тургускан болгаш, объектилерже материалдар чедирилгезинде үзүктелиишкиннер чок. Орук адырының бүдүрүлгелеринде айыыл чок чорукту сагыырының чугула хемчеглерин киирген, ылаңгыя коронавирус халдавыры-биле демиселдиң негелделерин ажылчыннар сагып турар» - деп, Кежик Дандаа чугаалаан. 

Тыва Республиканың орук-транспорт комплекизиниң сайыдынга «Восток» КХН-ниң чиңгине директору Сергей Уюсов тудуг шөлдеринде ажылдакчыларны доктаамал хынап турарын таныштырган. Хууда камгалал херекселдери база халдавырга удур ажыглаар суук бүдүмелдер-биле ажылдакчыларны хандырган. Коронавирусту болдурбас дээн чогуур чурумну тургускан. Ээлчеглиг ажылче үнер мурнунда эмчи хыналдазын эрттирип, хүннүң-не транспорт аймаан дезинфекциялап турар. Тудуг шөлдеринде халдавырлыг аарыгдан аараан таварылга чок». 

“Айыыл чок болгаш шынарлыг автомобиль оруктары” национал төлевилел чорудуу-биле бо чылын Кызыл хоорайга 22 объектиге ажылдарны кылыр. 10 ажыг километр орукту нормага дүүштүр эде тудар.