Республика баштыңының айыткалында өзек айтыышкынны Тываның Саң-хөө яамызы бодунда демдеглеп алган
17.12.2019
Тываның Баштыңы Шолбан Кара-оол декабрь 12-де Тыва Республиканың Дээди Хуралынга чылдың-на бээр айыткалын кылган. Аңаа чазак кежигүннери болгаш парламент депутаттары, муниципалдыг тургузуглар удуртукчуларындан аңгыда, эрге-чагырганың федералдыг девискээр органнарының төлээлери, хөй-ниити каттыжыышкыннарының база организацияларның баштыңнары киришкен.
Айыткал таныштырган ёзулалдың киржикчилери программалыг документиге хамаарыштыр үзел-бодалын үлешкен.
Орлан Достай, Тыва Республиканың саң-хөө сайыды:
- Саң-хөөчү кижи болгаш, бодумга кол айтыышкын кылдыр өг-бүлелерниң орулгазын өстүреринге байдалдарны тургузуп, шупту социал хүлээлгелерни күүседири чугула деп демдеглеп алдым. Ол сорулгаларны күүседир акша-хөреңгиниң немелде дөстерин тыварын саң-хөө яамызынга дааскан. Декабрь биле январьның дургузунда боттуг шиитпирлерни тып, республика баштыңынга ону илеткептер боор бис деп бодап тур мен.
Республикага “социал айтырыглар” кезээде бирги черге турган болгаш турар-даа. Баштыңның дыңнадыында, биче болгаш ортумак бизнес деңнелинде чаа бүдүрүлгелерни тургузарынга эге тепкииш кылдыр 554 млн. рубльди тускайлаанын чаңгыс чер-чуртугларымның кичээнгейинче угландырым. Эвээш эвес түң. Капиталдыг болгаш орук тудуунуң акша-хөреңгизинден ол акшаларны аңгы салган. Өскээр чугаалаарга, ол чартык миллиард рубль акшаны чаа бүдүрүлгелерни болгаш ажылчын олуттарны ажыдар кылдыр сайгарлыкчыларывыска курлавырлаан.
Возврат к списку
|