Тываның Баштыңы амгы үениң чижилгелиг экономиктиг байдалында харыысалга күштелгенин коллегаларынга сагындырган

Тываның Баштыңы Шолбан Кара-оол понедельникте, аппарат хуралында, ТР-ниң Чазак кежигүннеринге база муниципалдыг тургузуглар удуртукчуларынга федералдыг национал төлевилелдер күүселдезинге идепкейлиг киржирин сагындырган. 

Регион удуртукчузунуң чугаазы-биле алырга, республика экономиктиг чаа үе-биле чурттаар ужурлуг:

«Чурттуң президентизиниң национал төлевилелдери Тываның мурнунга улуг сорулгаларны салган. Республиканы хөгжүдер арга-хевирлер тургустунуп, чаа деңнелче көдүрлүрүнге харыысалга улгаткан. 2020 чыл - боттуг бергелерни ажып эрте бээр дээш билектерни сывырныпкаш, кызымак ажылдааннарны хынаар үе. Ол чугула ажыл-чорудулганың тодаргай көргүзүглерин федералдыг акша салыышкынының дузазы-биле чедип алыр. Частырыглар дээш эң шыңгыы харыысалганы чүктээр апаар. Аазатпайындан төлевилелди боттандырбааны дээш, шиңгээттинмээн акша-хөреңгини республика бюджединден торгаал кылдыр төлээр, ынчангаш харыысалга чок чоруктуң өртээ аарын сагындырдым. Мээң кыйгырыымны шупту деңнелде дыңнаан турар ужурлуг. Чаа үе биске – муниципалдыг удуртукчулардан эгелээш, яамылар болгаш ведомстволар удуртукчуларынга чедир частырыг дээш негелдениң чаа деңнелин хүлээндирер. Бир эвес тура-чүткүлдүг, демнежир болзувусса, бөгүнгү ажылывысты бистиң салгалдарывыс төлептии-биле үнелээр». 

Тываның Баштыңының бирги оралакчызы Александр Брокерт чаа школалар, уруглар садтары болгаш немелде тудуглар төлевилел-смета документилерин кылыры чугула деп чугаалаан. «Уруглар садтары тудар акша-хөреңгини дүрген шиңгээдир херек. Каа-Хем суурда спортчу-культура төвүнде ажылдар шимчеп эгелээн. Чылыг дамчыдар четки тудуу чорудуп турар. Эргижирээн оран-савадан чурттакчыларны өскээр көжүрер айтырыгны шиитпирлээр. Программалар күүселдезинге хүн бүрүнүң мониторингизин кылып турар бис» - деп, Александр Брокерт демдеглээн. 

Шиңгээттинмээн акша-хөреңги дээрге, тудуг шөлдеринге чеңин даап алгаш ажылдар ужурлуг оралакчы даргаларның, сайыттарның амы-хууда харыысалгазында деп, Тываның Баштыңы айыткан.