Тываның Баштыңы моол Шамбалага биле чаа цемент заводунга чораан

 Хүрээни 1821 чылда шажынчы башкы база эртемден лама Данзанравжаа үндезилээн. 108 субурган-биле бүргеткен хүрээ кижиге бедик хей-аътты берип, балыг черни безин экиртиптер күштүг ыдыктыг чер кылдыр санаттынар. Ол Улан-Батордан 400 км-де, Гоби ховузунуң чөөн талазында.  

Тываның Баштыңы Моолдуң Президентизинге өөрүп четтиргенин илереткен. Дээрги Халтмаагийн Баттулга российжи регионнуң удуртукчузу-биле бирги хүнде инфраструктура объектилерин кады эргээн. 

 «Тывага, Россияга, бистиң ниити төлевилелдеривиске сеткилинден улуг хүндүткел кылдыр  көрдүм. Оларның эң колунда – бисти харылзаштырган демир-орук бар. Президент-биле кады демир-орук болгаш өске-даа объектилерни кезип көрдүвүс. Акы-дуңмалышкы чоннар аразында найырал албан езузунуң дугуржулгаларынга күчүлүг курлавыр кылдыр каттыжып кээри, болдунмас чүвени болдуруптар-тыр, чаңгыс чер-чурттуглар!» - деп, Тываның Баштыңы Шолбан Кара-оол бодунуң бодалдарын үлешкен. 

Шолбан Кара-оол Моолдуң мурнуу-чөөн талазында Дорноговь аймакта, бо чылын ажыглалда кирген цемент заводунга база чораан. Завод «Монголын Алт» (МАК) компанияга хамааржыр. Ол чылда 1 млн тонна клинкер база 1,07 млн тонна цементини бүдүрер күчү-күштүг. 

 Ажыл-агыйжы албанның сөөлгү хүнүнде, Моолдуң президентизи Халтмаагийн Баттулга-биле ооң Улан-Баторда резиденциязынга ужурашкан. Ужуражылгада инфраструктура төлевилелдеринден аңгыда, туризмни сайзырадырының, Сибирьниң регионнарындан тарааны сөөртүрүнүң, мал ажыл-агый, көдээ ажыл-агый продукциязын болбаазырадыр адырда база өске-даа угланыышкыннарда кады ажылдажылга айтырыгларын чугаалашкан.