Тыва чурттар аразының бирги рейизин хүлээп алырынга белеткенип турар

Хуралга республика яамалары биле ведомстволарның, ол ышкаш чурттар аразының аргажылгазынга хамааржыр күрүне эрге-чагыргазының федералдыг органнарының регион эргелелдериниң удуртукчулары киришкен. Оларга кызыгаар таварты даштыкы хамаатыларның кирер, үнериниң, чүък киирер база үндүр сөөртүрүнүң чурумун хандырган кызыгаар албаны, таможня, ветеринарлыг хайгаарал база паспорт, валюта, санитарлыг, карантинниг дээш өске-даа албаннар хамааржыр. 

Кызылче октябрь 26-да ужуп кээр рейс шенелде-даа болза, Моолдуң Чазааның төлээлери ужуп келир улуг делегация болур деп, Шолбан Кара-оол дыңнаткан. Тыва-биле авиахарылзааны организастаарынга моол таланың улуг сонуургалдыын ол бадыткаан. Чурттар аразының аргыжылгазынга “Кызыл” аэропортунуң ажыттынганын российжи авиасөөртүкчүлер амдыызында билбээнде, кожаларның эгелээшкинин деткиир херек.

Тываның Баштыңы чурттар аразының авиашугумнарын ажыдары республикага ажыктыг деп санап турар. Бир дугаарында, экономиктиг болгаш садыглаашкын кады ажылдажылгазын калбартыр планда. Ол анаа-ла ындыг бодалдар эвес-тир, деп ол демдеглээн. Республиканың, ылаңгыя кызыгаар кожууннарның дыка хөй чурттакчыларынга моол рынок орулга ажылдап алырының кол база доктаамал дөзү апарган. Кижилер Россияда өртектен элээн чиик барааннар дээш ынаар чоруп турар. 

Россия биле Моолдуң баштыңнарының база чазактарының аразында ат салган дугуржулгалар езугаар ол кады ажылдажылганы чаа бедик деңнелче көдүрери чугула.

Шолбан Кара-оол бо хонуктарда Моолдуң Президентизи Халтмаагийн Баттулга-биле телефонга чугаалашканын, транспорт, кызыгаар, таможня база өске-даа инфраструктура адырында кады кылыр төлевилелдерни Улан-Баторга ужуражып чугаалажырын ол саналдаан деп дыңнаткан. Тываның Баштыңы Моолга сайгарып чугаалажыр чүүлдерни ажылдап кылырын хуралдың киржикчилеринге онааган.