Кызылдың Президентиниң кадет училищези беш харлаан

РФ-тиң камгалал сайыды С.К. Шойгунуң дужаалы-биле, 2014 чылда, кажан Кызылдың президент кадет училищезин үндезилеп тургусканда, аңаа 65 оолдар эң-не баштайгылары бооп өөренип кирген. Училищеде РФ-тиң тос регионунуң: Тыва, Хакас, Бурят Республикалардан, Кемерово, Челябинск, Иваново, Омск областардан, Красноярск, Камчатка крайлардан оолдар, кыстар өөренип турар. 2017-2018 өөредилге чылында кожа-хелбээ Моол Арат Республикадан оолдар кадеттар санынче дужаап кирген. 

Бо хүнде училищеде 371 оолдар, кыстар өөредилгеде, спортта, чогаадыкчы ажылдарда чедиишкинниг, чаңгыс өг-бүлениң ажы-төлү дег, эптиг найыралдыг, топтуг-чурумнуг, өөрүшкү маңнайлыг өөренип турарлар. Училищени бо чылын дооскан 41 кадеттер Россия Федерациязының Камгалал яамызының база чурттуң хамааты дээди өөредилге черлеринче шупту дужаап киргени - башкылар коллективиниң ажылынга улуг үнелел. 

Эрткен өөредилге чылдарының дургузунда училище бодунуң езу-чаңчылдарын хевирлээн: кадет болганын байырлаары, хүндүлүг аалчыларны уткуп-хүлээри, фестивальдар, мөөрейлерни организастаары, парад-чыскаалдарга киржири, Дөгээ даанче үнери, походтап, чайгы практикалаары, доозукчунуң кежээзинде үдежири дээш, оон-даа өске. Ындыг болза-даа бүгү талазы-биле сайзыраңгай, төрээн чуртунга ынак кижини өөредип-кижизидери - училищениң ажыл-чорудулгазының кол сорулгазы бооп арткан. 

Училище ниити болгаш ортумак тускай өөредилге программазындан аңгыда, инженер-техниктиг, лингвистика школаларының, чөөн-чүктүң дайынчы спортчу хевирлер школазының, уран чүүл болгаш этика школазының программалары-биле өөренип, кадеттерниң эртем-шинчилел ниитилежилгезин тургускан. Оолдар, уруглар немелде өөредилге программаларда 100 хуу хаара туттунган. Кадеттер хоорай, республикада, регионнар аразында, бүгү-российжи, бүгү-армейжи, делегей олимпиадаларында, өөредилге форумнарында, чогаадыкчы фестивальдарда болгаш спортчу маргылдааларда идепкейлиг киржип, бедик үре-түңнелдерни көргүскеш, чаңгыс эвес удаа тиилеп турары улуг чоргаарал. Кызылдың Президентиниң кадет училищезиниң кадет сургуулу деп атты оолдар, кыстар улуг чоргаарал-биле эдилеп чоруур. 

Президентиниң кадет училищезиниң башкылаашкын ажылында Россияның ниити болгаш профессионал өөредилгезиниң хүндүлүг ажылдакчылары, алдар-аттыг башкылар, арга-дуржулгалыг офицерлер, дээди категорияның кижизидикчи башкылары, хөйге билдингир тренер башкылар хаара туттунган. Улуг чурттуң, төрээн чериниң төлептиг оолдар, кыстарын өөредип-кижизидер хүлээлге оларда бо хүнде онаашкан. Олар өг-бүле, бир дем, акы-дуңмалышкы, ат-алдар, хүлээлге, эрес-дидим чорук, найырал деп чүүлдерге кадеттерни өөредип турар. 

"Бүгү талазы-биле сайзыраңгай кижини өөредип-кижизидер сорулганы күүседип, төрээн чурттуң төлептиг хамаатызын, ниитилелге херектиг тускай мергежилдиг кадрлары апаар аныяктарны белеткеп бээри – кадет училищезиниң бүгү башкы коллективиниң ажыл-чорудулгазының түңнел көргүзүү ында. Училищениң бөгүнгү башкылар коллективи ону чедиишкинниг боттандырар ужурлуг" - деп, Тываның Баштыңы Ш.Кара-оол демдеглээн турган. 

Кызылдың президент кадет училищези “Россияның 100 тергиин дээн өөредилге черлери” бүгү-российжи конкурска тиилеп, быжыг билиин, эки сагылга-чурумун, спортчу болгаш тергиин шериг белеткелин бадыткаан. Эки үре-түңнелдерни көргүзүп, ажыл-ишке шылгараан башкыларга ведомство болгаш күрүне шаңналдарын байырлыг байдалда тывыскан.