Тыва - «Айыыл чок болгаш шынарлыг автооруктар» төлевилелдиң тускай сорулгалыг көргүзүглерин күүседир талазы-биле Россияның мурнуку он регионунуң санында

Тываның орук-транспорт комплекизиниң сайыды Олег Бады национал төлевилел күүселдезиниң дугайында республика чазаанга илеткээн. 2019 чылда кылыр ажылдар хемчээлинде айыттынганы 41,9 км орук шывыын, ооң 26,3 км – регион оруу, 15,6 – муниципалдыг оруктарны, ноябрь төнчүзүнге чедир орукчулар септеп доозуптар деп ол дыңнаткан. Бөгүнде орук тудугжулары 37,2 км орукту чогуур негелдеге дүүштүр астальтылап кылган, азы бүгү ажылдың 87,7 хуузун. 

«Айыыл чок болгаш шынарлыг автооруктар» национал төлевилелди 2019 чылда регионга боттандырары-биле 602,1 млн. рубльди аңгылаанын сайыт дыңнаткан. Ынаар федералдыг бюджеттен 346 млн. рубльди, республиканыындан – 256,1 млн. рубльди тускайлаан. Акшаландырыышкын долу болгаш үезинде кээп турарындан арткан ажылдарны ноябрь 30-ге чедир доозуптарын сайыт чугаалаан. Олег Бадының чугаазы-биле алырга, Тыва бөгүнгү түңнелдери-биле «Айыыл чок болгаш шынарлыг автооруктар» төлевилелдиң тускай сорулгалыг көргүзүглерин күүседирде Россияның мурнуку он регионунуң санында кирип турар.