Тывада «Башкымга мөгейиг» акция чоруп турар

Ынак башкывыс хүндүлүг дыштанылгада, аравыста чок-даа болза, бистиң сагыш-сеткиливисте балалбас исти арттырып каан. Башкыларывыс эртем-билиг-биле чүглеп, бодамчалыг, шынчы болгаш туруштуг мөзү-бүдүш-биле бүгү чүвени чедип алыр кылдыр чагып-сургап өөредип чоруур. 

Тыва Республиканың Хөй-ниити палатазының эгелээшкини-биле, 2019 чылдың сентябрь 26-дан октябрь 11-ге чедир, Башкылар хүнүнге тураскаадып “Башкымга мөгейиг” деп акцияны республикада эрттирип турар.

 Акцияга бодунуң башкызынга чылыг чымчак сөстерни дамчыдар күзелдиг школачылар, оларның ада-иелери болгаш кижи бүрүзү киржип болур. Ону кылырда, #БашкымгаМогейиг#ПоклонМоемуУчителю хештегни айытпышаан, башкызының ажылдап турар черин, азы чурттап турар черин айтып, башкызының чуруунга (архивтен база болур), видеозунга сөзүглелдиг үделгени социал четкилерге салыр. 

Байыр чедириишкиннери чаңгыс кижинии азы коллективтии бооп болур, ону парлааш ийикпе азы электроннуг хевирге чорудар. Ажы-төлүнүң башкыларынга коллективтиг байыр чедириишкинин чедирерин өөредилге организацияларында ада-ие комитеттеринге сүмелээр. 

Акцияга кол негелде болза, школаны, ортумак тускай өөредилге черин, дээди өөредилге черин, хоорайын, кожуунун, ол ышкаш башкызының ат-сывын, адазының адын албан айтыр. 

Фейсбук, вКонтакте база Инстаграм социал четкилерге салыр материалдарга #БашкымгаМогейиг#ПоклонМоемуУчителю хештегни айтыр, ол бүгү Тыва Республиканың Чазааның албан езунуң арыннарынга парлаттыныр, база Тыва Республиканың Чазааның сайтызында интерактивчи лентага боду-ла салдына бээр. 

Оргкомитет акцияның түңнелдерин хар-назы аайы-биле (1-4 класстарның, 5-9 класстарның, 10-11 класстарның өөреникчилери, эрткен чылдарның доозукчулары) дээш, база дараазында: «Башкызынга шүлүктээн эң эки байыр чедириишкини», «Башкызынга чогаадып бижээн эң эки байыр чедириишкини», «Башкызынга хөгжүмнүг эң эки байыр чедириишкини», «Башкызынга эң онзагай тывынгыр байыр чедириишкини» номинацияларга үндүрер. 

Кижи бүрүзүн акцияга идепкейлиг киржиринче кыйгырдывыс. Башкыңга байырдан чедирип – сагыш човаашкының көргүс!