«Россияның болуушкуннары» турисчи төлевилелдер мөөрейиниң түңнел кезээнче «Тыва хойнуң эъди» фестиваль кирген

Сентябрьның 19-20 хүннеринде Новосибирск хоорайга болуушкуннар төлевилелдерин таныштырган мөөрей болуп эрткен. Ыраккы Чөөн чүк, Сибирь, Урал база Приволжье – 4 округтуң регионнар төлээлери боттарының турисчи продуктуларын таныштырган. Тыва ийи аңгы кезекте - «Культура. Гастрономия болуушкуннары» база «Муниципалдыг тургузуглар. Болуушкуннар шөлчүгежи» шаңналдарже кирген. 

Тыва Республиканың Экономика яамызының эрттиргени «Тыва хойнуң эъди» гастрономия шуулганын база Улуг-Хем кожуун чагыргазының организастааны “Тываның чүрээнче кокпа оруктап” регионнар аразының fashion-фестивалын таныштырган. Бо ийи болуушкуннар боттарының номинацияларынга ийиги черлерни алган. Гастрономия болуушкуннарының кезээнде 50 муң хире киржикчилиг 11 аңгы төлевилел шаңналче кордап турганын демдеглезе чогуур. Ноябрьда Москва хоорайга эртер түңнел кезекке Тываның төлевилелдери тиилекчилер-биле кады киржир. 

«Россияның болуушкуннары» премия Болуушкуннуг туризм специалистериниң национал ассоциациязының тургусканы “Хүндүлээчел Россия” делегей төлевилелиниң болуушкуннуг туризмни хөгжүдер национал программаны үнелээр база мониторинг кылыр бир хевири дээрзин сагындыраал. Российжи регионнарның турисчи продуктуларын нептередир дээш Туризм талазы-биле федералдыг агентилелдиң информастыг деткиишкини-биле ук мөөрей эртип турар. 

Болуушкуннуг туризм специалистериниң национал ассоциациязының тургусканы болуушкуннуг туризм адырында “Россияның болуушкуну” бүгү-российжи премияны эгелээшкиннер, төлевилелдер болгаш болуушкуннар ажык мөөрейиниң түңнели-биле болуушкуннуг туризм адырында тыпсыр бирги профессионал шаңнал болур. 

Премияның сорулгазы - Россияның болуушкуннуг туризм адырында профессионал деңнелде эң эки арга-дуржулгаларны илередип, ону бурунгаарладып, сайзырадырынга дузалажыры, болуушкуннарның организаторларын болгаш ону эрттирип турар девискээрлерни долгандыр коммуникация болгаш хөй-ниитичи-профессионал хүрээлелди хевирлээри болур.