Дээди Хуралдың депутаттарынче соңгулдаларны эрткен деп санаан

Тыва Республиканың Соңгулда комиссиязы “Тыва Республиканың Дээди Хуралының депутаттар соңгулдаларының дугайында” Тыва Республиканың Хоойлузунуң 78 чүүлү езугаар, Тыва Республиканың Дээди Хуралының (парламент) үшкү чыыжының депутаттар соңгулдаларында республиканың чаңгыс аай соңгулда округтарының талазы-биле Тыва Республиканың девискээринде республиканың чаңгыс аай соңгулда округунуң бадылаашкын түңнелдериниң дугайында протоколду база соңгулда каттыжыышкыннарының аразында депутат мандаттарны үлээнин база бадылаашкын түңнелдериниң дугайында ниити таблицаны бадылаан.

 “Тыва Республиканың Дээди Хуралының депутаттар соңгулдаларының дугайында” Тыва Республиканың Хоойлузунуң 76, 77, 78 база 80 чүүлдери езугаар, Тыва Республиканың Соңгулда комиссиязының Тыва Республиканың девискээринде республиканың чаңгыс аай соңгулда округунуң бадылаашкын түңнелдериниң дугайында база соңгулда каттыжыышкыннарының аразында депутат мандаттарны үлээниниң протоколунга даянгаш, ол ышкаш Тыва Республиканың Дээди Хуралының (парламент) үшкү чыыжының депутаттар соңгулдаларының талазы-биле территориалдыг соңгулда комиссияларының №1 протоколдарын үндезинге алгаш, Тыва Республиканың Соңгулда комиссиязы республиканың чаңгыс аай соңгулда округунда база чаңгыс мандаттыг 16 соңгулда округдарында Тыва Республиканың Дээди Хуралының (парламент) үшкү чыыжының депутаттар соңгулдалары болуп эрткен болгаш шынныг деп санаан. 

Тыва Республиканың Дээди Хуралының (парламент) үшкү чыыжынче, республиканың чаңгыс аай соңгулда округундан база чаңгыс мандаттыг 16 округдан, шупту 32 депутатты чон бадылаан.

Соңгулдаларга 141005 кижи, азы даңзыда кирген соңгукчуларның 75,03 хуузу бадылаан. “Чаңгыс демниг Россия” бүгү-российжи политиктиг партия дээш 112319 соңгукчу азы, үнүн бергеннерниң 80,13 хуузу бадылаан. «ЛДПР – Россияның Либерал-демократтыг партиязы» политиктиг партия 10868 үннү азы 7,75 хууну алган. «Чөптүг Россия» политиктиг партияга 6389 кижи (4,56%) үнүн берген, КПРФ дээш – 5082 (3,63%), «Россияның коммунистери» партия дээш – 3229 (2,30 %).

 “Чаңгыс демниг Россия” БПП-ниң Тывада регион салбыры 14 депутат мандатты алган болза, “ЛДПР” ПП Тывада салбыры – 2 мандаттыг болган.