Тываның онкология эмнелгезинде херелдер-биле эмнээр дериг-херекселди эккелген

Сес тонна аар аппаратты бүгү негелделерге дүүштүр эптээр ажылдаар чоруп турар. «Рокус АМ» дериг-херексел-биле ыжыкты тодаргай ырактан чирттип, эмнээр.  

Тыва Республиканың Чазаа “Кадык камгалал” национал төлевилел иштинде регионнуң тускай сорулгалыг төлевилели-биле аппаратты садар акша-хөреңгини камгалап алган. 

40 чыл хире ажыглаан ийи дериг-херексел сандан үнген соонда, 2018 чылдың январь 1-де ону үндүр бижээн. Тускай специалистерни чалааш, улуг аппараттарны хирээлеп, часкан турган.  

Чаа дериг-херекселден аңгыда, хөй ажыглалдыг кезиишкин кылыр столду, хоолгалаар микроскоп лаброторияны салган, ам эмчилерниң консилиумун эрттиреринге чурттуң тускай угланыышкынныг эмнелгелеринче шинчилгениң түңнелин дамчыдар арга тургустунган.

“Кадык камгалал” национал төлевилел чорудуу-биле республиканың онкология албаны 300 млн рубль ажыг түңге амгы үениң тускай медицина техникаларын алыр. Бо бүгү чаартылгалар ыжык аарыгларын үезинде тодарадып, ону хоочурадырын кызырар ужурлуг. 2018 чылда 100 муң чурттакчыга онааштыр ыжык аарындан 133 чок болган болза, 2024 чылда ол көргүзүг 120 чедир эвээжээр ужурлуг. 2018 чылда хоралыг ыжык аарыглыг кижилерни илереткени 100 муң кижиге онааштыр 56,8 турган болза, 2024 чылда ол 63 чедер ужурлуг.