Тываның чурттакчылары үшкү чажы төрүттүнген дээш субсидияны алыр

«Бадыткап шыдаптывыс, чаңгыс чер-чурттуглар! – деп, Шолбан Кара-оол социал четкилерде бодунуң арынында бижээн. – Бистиң Тывада 2020 чылдың январь 1 соонда төрүттүнген үшкү база оон дараазында чаштары дээш ада-иелер ай санының пособиезин 2020 чылдан эгелеп ап эгелээр». 

Тываның социал-экономиктиг хөгжүлдезин дүргедедир программаны ажылдап тургаш, ол төлевилелди боттандырган регионнар санынче республиканы киирип алган бис, деп Тываның Баштыңы демдеглээн. Шолбан Кара-оолдуң дыңнадыы-биле алырга, республика ол сорулгага келир чылын 180 млн рубльди, а үш чыл дургузунда – 1,5 млрд ажыг рубльди алыр. 

«Чоннуң чайгаар өзүлдези хоомай регионнарда чаштарның төрүттүнерин деткиир дээш пособиениң ол хевирин киирген – деп, Шолбан Кара-оол тайылбырлаан. – А бисте сыр дедир: үш болгаш оон хөй ажы-төлдүг өг-бүлелерниң саны 30 муң ажыг – эки көргүзүг-даа ышкаш, ычналза-даа ооң артыкы талазында – түреңги чорук бар. Ындыг өг-бүлелерде акша-көпеектиң чедишпези шын». 

Ындыг болзажок Тываның Баштыңы мону демдеглээн: ажы-төлү хөй өг-бүлелерге күрүнеден немелде дуза кылдыр пособиениң ол хевирин бээрин Тыва бадыткаан. «Шынын чугаалайн: программада ол магадылалды аптарывыска, эктимден аар чүък адырлы берген ышкаш болду. Хөй ажы-төлдүг өг-бүлелерге көпеек безин дузалыг» – деп, Шолбан Кара-оол чугаалаан.