Тываның Баштыңы эмчилер-биле ужуражылгада республиканың уруглар эмнелгези туттунарын чугаалаан

Кадык камгалалында национал төлевилелдерниң болгаш регион программаларының күүселдезин аңаа чугаалашкан. Шолбан Кара-оол ол ужуражылганың чамдык түңнелдерин социал четкилерде бодунуң арынында дыңнаткан.  

«Республиканың 1 дугаар эмнелгези Склифосовскийниң алдарлыг институду ышкаш Тывада билдингир. Республиканың кадык камгалал системазының аңгы-аңгы адырлары ында мөөңнеттинген. Дыка хөй тускай мергежилдиг эмчилер чоннуң кадыын камгалаар дээш мында ажылдап турар. Чурттуң Президентизи чоннуң кадыкшыл байлаан камгалаарын национал төлевилелдер-биле быжыглаан. Ол программаларның күүселдезин, амыдыралдың кадык хевирин кижи бүрүзү медереп билзин дээш, хан-дамыр болгаш ыжык аарыгларын эвээжедиринче тодаргай кандыг ажылдар кылдынып турарын чугаалаштывыс” – деп, республика Баштыңы бижээн.  

Национал төлевилелдерниң сорулгаларын күүседириниң чугула талазы чүгле акша-хөреңгиде, күш-ажылчы болгаш өске-даа курлавырларда эвес деп Шолбан Кара-оол санаан. Кадык камгалал системазының кол ажылы – кижилерниң кадык камгалалын бурунгаар хөгжүдер дизе, медицинаны кандыг-даа деңнелде удуртуп-башкарар ажылдарның чурумун тода тургузуп, ооң утказынче кирип, төнчү түңнелдерни мурнунга салырында.

Республиканың Баштыңы Тывада медицина инфраструктуразын хөгжүдер айтырыглар талазы-биле эмчилерниң идепкейжи туружун демдеглээн. Эмчилер ук адырда чаа идеяларны болгаш санал-оналдарны киирип, чаагай күзээшкиннерни илереткен. Чазактың планнарында оларның хөй кезии кирип турарын Шолбан Кара-оол дыңнаткан. Тываның эмчилериниң шагдагы күзели – кезиишкин кылдыр салбырлыг, хөй угланыышкынныг республиканың уруглар эмнелгезин Кызылга тудар деп турарын чазак даргазы чугаалаан. Республика Чазаа ындыг төптү тудар чөпшээрелди Россияның Кадык камгалал яамызындан алган, келир чылын объектиниң дөзевилел-смета документилерин кылып эгелээр.