Тываның социал-экономиктиг хөгжүлдезиниң комплекстиг планының ажылчын хевиринде 169 инвестиция төлевилелдери кирген

Эрткен неделяда, Россия Чазааның даргазының бирги оралакчызы Антон Силуановтуң деңнелинге болган хуралда, 2025 чылга чедир Тываның социал-экономиктиг дүрген хөгжүлде планының төлевилелин сайгарып көрген.  

Хемчеглер планын ажылдап кылган ажылчын бөлүктүң удуртукчузу, экономиктиг хөгжүлде сайыды Максим Орешкин чазак даргазының оралакчызынга ону киирген. 

Ниитизи-биле 224 хемчег план төлевилелинче кирген. Оларның 55-и организастыг хемчеглер болза, 169-у – инвестиция төлевилелдери. Баш бурунгаар санаашкыннар-биле алырга, 2019 чылдан 2025 чылга чедир хемчеглер болгаш төлевилелдер планнарын боттандырарынче ниитизи-биле 712 млрд. ажыг рубль түңнүг акшаландырыышкын херек. 

Россияның премьери Дмитрий Медведев март 27-де эрттирген хуралында, республиканың дүрген хөгжүлде планының дөзевилелин кылыр даалганы берген, ынаар улуг инфраструктура төлевилелдери киргенин Тываның Экономика яамызы дыңнаткан. Ол дээрге, алызы барып Моол болгаш Кыдатче угланган Курагино - Кызыл демир-оруун тудары, бедик күчүлүг электри дамчыдар шугумну шөйери, экспорт угланыышкынныг автомобиль оруктарының четкизин хөгжүдери-дир. Май 20-де Кызылга Максим Орешкинниң удуртканы үнүүшкүннүг хуралда, оон аңгыда, план төлевилелинче социал объектилерни чаартыр база көдээ ажыл-агый бүдүрүкчүлеринге күрүне деткимчезин улгаттырар улуг программаны киирген.