РФ-тиң Чазак делегацияның ажыл-чорудулгазының түңнелдери саазын кырынга артпас

Экономиктиг хөгжүлде сайыды Максим Орешкин баштаан Россия Чазааның делегециязының республикага ажыл-албанының түңнелдери саазын кырынга артпас.  

Россияның тудуг болгаш чуртталга-коммунал ажыл-агыйының сайыды Никита Стасишин ооң дугайында чугаалап тура, маңаа ажыл-албанның түңнелдери Тудуг яамызының талазындан тодаргай хөделиишкиннерни болдурар деп демдеглээн.  

«Тудуг яамызының харыылап турары “Чурттаар оран-сава болгаш хоорай хүрээлели” национал төлевилелдиң боттаныышкынын көрүп, шупту төлевилелдерни аңгылап чугаалаштывыс. Чер участоктарының инженерлиг инфраструктуразын хандырарынга республиканың хүлээп алыр ужурлуг чүүлдеринге саналдарны киирдивис. Чуртталга тудуун көвүдедир, таарымчалыг хоорай хүрээлелин тургузар база таарымча чок бажыңнардан өскээр көжүрер дугайында айтырыгларны база сайгардывыс” – деп, Никита Стасишин чугаалаан.  

Тываның Баштыңы Шолбан Кара-оол шупту адырлар сайыттарының оралакчыларын чыыпканы ажылга дээштиг болганын тудуг сайыдының оралакчызы демдеглээн. «Чамдык бөлүктүң хамаатыларынга дөрбелчин метрниң өртээн эде көөрүн сайгарып тура, чиге айтырыгларны даандырдывыс – деп, Никита Стасишин дыңнаткан. – Келир чылын чүгле чаа бажыңнарны эвес, а чаа инфраструктураны көөр боор бис деп бодап тур мен”.