Тывада бир бөрүнү узуткааны дээш аңчы кижиге дөрт муң рубльди бээр

Регионнуң чазаа “2019-2021 чылдарда Тыва Республиканың девискээринде бөрүлер санын таарыштырар хемчеглер дугайында” доктаалды хүлээп алган.  

Документ муниципалдыг кожууннарга чорудар хемчеглер планын бадылап, “Тыва Республиканың девискээринде бөрү аглаар эң эки бригада” деп ат дээш мөөрейниң чурумун доктаадып, бөрү узуткааны дээш шаңнал акшазын тыпсырының дүрүмүн киирген.  

План езугаар чылдың-на републикада 645 бөрүнү узуткап турар. Ол бөрүлерниң 40 хуузу. Чижээ, Тожу кожууннуң аңчылары 124 бөрүнү адып чок кылыр ужурлуг. Ол кожууннуң девискээринде эң хөй – 217 бөрү бар. 

 2018 чылда республика девискээринде 1595 бөрү бары демдеглеттинген. 1000 гектар черде оларның туруп болур ужурлуг санындан 2-3,5 катап хөй. Мал-маганче кокайлар халдаанындан көдээ ажыл-агыйы улуг каражага таваржып турар. 2018 чылда когаралдың түңү 38 миллион ажыг рубль болган. 

Тываның көдээ ажыл-агый яамызы кокайларның 20 хире хуузун чылдың-на узуткаарын дыңнаткан.