Закрыть
Логин:
Пароль:
Забыли свой пароль?

Войти    

Тываның Баштыңы майның дыштаныр хонуктарында чажыт арага садып турарлар-биле демиселди күштелдирерин негээн

Тываның Баштыңы майның дыштаныр хонуктарында чажыт арага садып турарлар-биле демиселди күштелдирерин негээн 24.04.2019
Эрткен неделяда Тывага 2,8 муң литр чажыт арага продукциязын садыг-саарылгадан хавырган. Регионнуң айыыл чок чорук департаментизиниң медээзи-биле алырга, чедери берге Тожу кожууннуң оруунга кандыг-даа документилер чокка арага сөөрткен 4 микроавтобусту туткан. 
«Арага сөөртүкчүлериниң байырлалдар бүдүүзүнде, ылаңгыя чаа чылдың азы майның узун хонуктарында, Тываже тонна-тонназы-биле бодунуң хоранын чедирип алыр дээш, идепкейи көдүрлүп кээр. Полиция биле улусчу дружиналарның май 1 бүдүүзүнде эрттирген рейдилериниң түңнелдери байдал кандыызын көргүскен. Водканы колдуунда-ла чедери берге Тожу биле Мөңгүн-Тайгаже чедирип турар болган. Корум-чурум камгалакчылары-биле ындыг хүннерде бо угланыышкында ажылды күштелдирерин дугуруштувус» - деп, Тываның Баштыңы Шолбан Кара-оол рейдилерниң түңнелинге хамаарыштыр чугаалаан. 
Чажыт арага садыгжыларының кончуг идепкейжи ол үезин ажыглаар херек. Ынчангаш майның дыштаныр хонуктарында, тус чер бот-башкарылга органнары полиция-биле кады, спирт холуксаалыг продукция садып турар черлерни илередир ажылды күштелдирер. Эрткен чылын ынчаар ажылдааш, 112 “адрестерни” илереткеш, оларның ээлеринге административтиг харыысалганы онааган. 
«Бутлегерлерни харыысалгага онаап болур бүрүн эрге кожуун чагыргаларында бар. Ынчангаш байырлалдар соонда, арага садып-саарарының чурумун хажытканынга, хоойлуга чөрүштүр кайы хире арага сатканынга чеже протокол долдурганын, профилактиктиг кандыг хемчеглер алганын, ооң түңнелдери кандыг болганын аңгы илеткелде дыңнаар бис” – деп, Шолбан Кара-оол муниципалитеттер баштыңнарынга сагындырган. Республика баштыңы найысылалдың солагай талакы дачаларында чөпшээрел чокка ажык-чарлыы-биле арага садып турар садыгларже, бажыңнарже онза кичээнгейни угландырарын айыткан.

Возврат к списку